ALERTA BICHOS!

En educación infantil continúan entusiasmados e entusiasmadas co seu último proxecto: os insectos.

Non hai bicho en Guláns que se escape á súa curiosidade nin á súa lupa. Por suposto, nin se lles pasa pola cabeza facerlles dano, pero talvez os estean angustiando un pouco con tanto amor… En fin, que os sufridos animaliños emigran buscando tranquilidade…

Os que viven a corpo de rei son os vermes de seda. Entre que non teñen demasiado movemento e que están a comer moreira fresquiña todo o día, cada vez están máis gordiños. Moitos deles xa empezaron a fiar o seu capullo de pura satisfacción.

Apaixonante o mundo animal e fascinante a aprendizaxe dos máis pequenos e pequenas en contacto coa natureza.

Moi bo traballo!

XOGOS POPULARES EN SALVATERRA

O alumnado de 4º de primaria desfrutou onte da xa tradicional xornada de xogos populares no parque de A Canuda. Hoxe foi a quenda do 5º e 6º curso.

Ambas xornadas, asolladas e calorosas, lémbrannos que o verán está preto e que o curso escolar chega ao seu fin.

Aproximadamente 300 nenos e nenas rotaron polos distintos xogos: chave, zancos… demostrando, unha vez máis, que os xogos de sempre aínda triunfan e que a infancia continúa desfrutando da natureza e do movemento.

O noso máis sincero agradecemento ás persoas que, coa súa dedicación e esforzo, fan posible esta actividade cada ano!

 

PROXECTO: AQUÍ NON SE TIRA NADA!

 

En 5º de primaria están a aprender a aplicar as 3 R do Medio Ambiente: Reducir, Reutilizar e Reciclar.

Apropiáronse das caixas baleiras dos folios para crear caixóns de almacenamento para a aula de música. Parecen de deseño!

O máis importante é que aprenderon unha valiosa lección: Un obxecto non ten que ser novo para ser fermoso e práctico. Ademais, cando lle asignamos, como fixeron eles e elas, unha nova funcionalidade ou unha nova estética, estimulamos a creatividade e a capacidade de aprender “facendo”.

Bo traballo!!!

BEGOÑÍSIMA

 

Este ano o Día das Letras Galegas, como xa sabedes, está dedicado á destacada escritora e activista Begoña Caamaño.

O alumnado de 2º de primaria investigou a súa biografía a través da canción “Begoñísima”, de Uxía e Malvela.

Por suposto, aproveitaron a ocasión para practicar a lectura e mellorar a súa comprensión. Como produto final: un divertido libro de pasatempos con actividades centradas en datos sobre a autora.

Bo traballo!!!

LETRAS GALEGAS 2026

 

En galego fala o mar, en galego fala a choiva, en galego fala a antiga casa de pedra… Que fale en galego a escola!

Pasamos o ecuador dunha semana dedicada ás nosas letras.

Co lema “O galego, unha lingua máis no mundo” inauguramos a exposición do libro “O principiño”, traducido a unha chea de linguas distintas. Moitas grazas á familia de Petra, Martin e Oliver, por prestarnos a súa colección. Coidarémola coma se fose nosa ou máis!

Unha das actividades estrela este curso foi a xornada de baile tradicional. Da man de Erica Iglesias todo o alumnado do centro puido aprender e practicar a nosa fermosa danza. Todo un éxito!!!

FEIRA DOS MINERAIS DE GULÁNS 2026

 

Do 8 ao 10 de maio celebrouse a Feira de Minerais de Guláns e, en educación infantil, que non deixan pasar ningunha ocasión para saír a coñecer mundo, decidiron visitala.

Observaron con curiosidade os 13 expositores de minerais, xemas, xoiería e mesmo fósiis. Fixeron moitas (moitas moitas) preguntas e regresaron ao colexio cunha aventura máis que contar.

Por certo, pórtanse tan ben que dá gusto ir eles e con elas a calquera sitio!!!

CORPUS NO COLE

 

Como aperitivo de unha das celebracións máis emblemáticas de Ponteareas, sempre programamos no colexio un MiniCorpus no que os máis pequenos e pequenas aprenden as técnicas básicas dos nosos alfombristas con máis experiencia: deseñar, debuxar, esfollar as flores…

Nesta ocasión foi o alumnado de educación infantil e primeiro ciclo de primaria o que participou na nosa pequena tradición. Nas imaxes podedes ver o resultado do seu bo facer.

Moitas grazas ao Concello de Ponteareas por organizar esta fermosa actividade un ano máis!!!

FAMILIAS NA ESCOLA: ELIOT E SAÚL

 

Como nos gusta que as familias nos presenten aos seus novos membros!

A nai de Eliot visitou educación infantil co pequeno Saúl, protagonista indiscutible da xornada. Cos seus ollos como pratos cheos de curiosidade escoitou á súa nai contar dous contos sen dicir nin mu. Parece moi moi moi tranquilo, pero quen sabe, ás veces as aparencias enganan… O que si temos claro é que pode aprender moitísimas cousas do seu superirmán maior.

Moitas grazas pola visita, os nenos e as nenas desfrutaron moitísimo con vós!!!

CINEFÓRUM INFANTIL: "NON XOGUES COMIGO"

O pasado 2 de maio conmemorouse o Día Mundial Contra o Acoso Escolar e aproveitamos a ocasión para falar do tema co alumnado de segundo e terceiro ciclo do primaria.

A escusa foi un cinefórum. Vimos a curtametraxe “Non Xogues Comigo” e analizamos, tanto as situacións expostas, como as emocións e os pensamentos de cada personaxe. 

Falamos de empatía, de amizade, de compañeirismo, de bromas aceptables e inaceptables…

Esperamos contribuír a que, cada vez, sexamos máis sensibles e intolerantes co acoso no Feliciano Barrera: NON son cousas de nen@s e SI teñen importancia!!!

Como sempre, agradeceremos toda información ou proposta que queirades transmitirnos en relación cunha convivencia positiva e inclusiva no centro.

NUN PAÍS MULTICOLOR...

O venres 8 de maio celebrouse unha nova edición da Feira das Ciencias de Ponteareas. Tema: o marabilloso mundo das abellas.

Alumnado de 6º de primaria atendeu moi ben o seu posto, centrado na elaboración artesanal de velas.

Ademais, informaron a todas as persoas que así o quixeron de conceptos tan interesantes como a anatomía das abellas, o ciclo da súa vida, a importancia que teñen para o ser humano… Un gran traballo!!!

Moitas grazas a todos e a todas as que vos achegastes á Praza de Abastos a arroupar ao noso alumnado.

Grazas tamén, por suposto, ao Concello de Ponteareas por organizar esta actividade un ano máis!!!

 

Club de Lectura "Os Curriños"

Nestes último trimestre, os nenos e nenas de 2° estamos levando a cabo un Club de Lectura xunto cos alumn@s de 2° do CEIP Mondariz - Balneario. "Curriño", que así se chama o libro, xa nos propuxo un reto antes de comezar a lectura: grabarnos un video para poñernos cara e coñecernos. E nós que somos moi ben mandadiños, puxémonos mans a obra co noso video. Que vos parece?

Agardamos ter pronto novas noticias de Curriño e novos retos.

VAI DE MUSEOS

 

Pechando xa o proxecto competencial de 4º de primaria, o alumnado preséntanos os tres museos nos que estiveron traballando por equipos: O MUSEO DO PRADO, O MUSEO DO LOUVRE e O MUSEO DE VAN GOGH. Unha vez seleccionado o museo no que querían traballar, pescudaron datos sobre localización, antigüidade, prezo da entrada, días de apertura... Máis tarde seleccionaron tres obras da colección de cada museo e puxéronse mans á obra para pescudar autor, data, materiais, técnica, interpretación...

Uns auténticos investigadores de arte, quereres saber máis? Achegádevos aos seus lapbooks para coñecer os seus traballos.

SPRING ART

 

Corazóns, tulipáns, margaridas, paxaros e bolboretas enchen de luz e de cor fiestras e corredores no Feliciano Barrera.

Ás clases de Plástica Bilingüe chegou a primavera e fíxoo ao grande! Os nenos e as nenas de primaria exploran as súas habilidades manuais e creativas mentres aprenden novo vocabulario. O alumnado de 6º aproveitou tamén para crear os obxectos e a decoración necesaria para as súas exposicións na Feira das Ciencias de Ponteareas.

Hello, spring!!!

RetARTE MAIO

 

Último RetArte do curso!

Nesta ocasión non buscamos a unha, senón a dúas artistas galegas. Os seus nomes dámosvolos como pista: María e Sara.

Como se chaman cando actúan xuntas?

Respondede, como sempre, na caixa de correos de Leo León!

X CAMPIONATO DE AXEDREZ FELICIANO BARRERA

 

E xa van 10! Unha primavera máis as neuronas dos nosos nenos e nenas fan deporte no seu ximnasio particular: o taboleiro de xadrez!

Durante os recreos, alumnado de primaria e de educación infantil pon a proba a súa estratexia e capacidade de anticipación.

Nas imaxes podedes ver o debut de dous dos participantes máis novos ante as atentas e silenciosas miradas de alumnado de diversos cursos.

Seguiremos informando!

FEIRA DAS CIENCIAS DE PONTEAREAS 2026

 

Non faltedes mañá a un dos nosos eventos escolares favoritos: A Feira das Ciencias de Ponteareas.

Este ano o tema é inmenso e pequeniño ao mesmo tempo: o mundo das abellas.

Os nosos alumnos e alumnas de 6º de primaria prepararon a exposición con todo o seu agarimo e habilidade científica. Non quero contarvos demasiado, prefiro que vos acheguedes a vela! Só dicir que o produto final é moi cálido e agradable…

IMPORTANTE: Este ano, debido á inestabilidade climatolóxica da primavera toliña que nos tocou, celébrase na Praza de Abastos.

Estaremos alí desde as 17.00 ata as 20.30.

Agardámosvos!!!

STREET DANCE

 

Un ano máis as danzas urbanas encheron o Feliciano Barrera de boa vibra.

Desde 4º de educación infantil ata 6º de primaria todo o alumnado tivo a oportunidade de mostrar as súas habilidades de improvisación e creación en equipo.

Por que practicar baile urbano na escola?

Porque aprender unha coreografía estimula a memoria e a atención. Porque o movemento harmónico do corpo pon a proba e favorece a coordinación e o equilibrio. Porque a danza permite a expresión de emocións a través do corpo….

E, para rematar, pero moi importante: porque é incriblemente divertido e liberador!!!

Moitas grazas ao Concello de Ponteareas por organizar e financiar esta actividade!!!

Arte galega: a cerámica de Sargadelos

O alumnado de cuarto de primaria estivo moi entretido pescudando sobre arte galega e atopouse coa cerámica de Sargadelos: investigaron a súa interesante historia e expuxeron todo o proceso de produción das pezas. Reproduciron algúns dos seus deseños de vaixela e inspiráronse nalgunhas das figuras da marca  de cerámica para modelar as súas propias figuras. Hai moita arte neste grupo!

SOÑA NA HORTA

 

Que importante é o contacto coa natureza en educación infantil!

Remata o mes de abril e chega o momento no que os mestres e mestras damos un paso atrás e deixamos ensinar a outros: á terra, á auga, ao sol…

É o momento de poñer en marcha a horta no Feliciano Barrera!

ABRIL: MES DA VERGOÑA E ORGULLO

Rematamos o mes de abril que adicamos a VERGOÑA E ORGULLO. Coñecimos as obras de Max Kingler, Tutmose e, de novo, Picasso. 

O alumnado tratou de pensar en logros persoais dos que estiveran orgullosos, ilustraron a vergoña e escribiron mensaxes para comprender e empatizar a vergoña noutras personas.

Agora adentrámonos no último mes de proxecto, maio será o mes da calma e a serenidade.

FAMILIAS NA ESCOLA: LUCA

 

En educación infantil están moi emocionadas e emocionados cun dos seus novos proxectos: Insectos.

Como noutras ocasións, relatores expertos viñeron a visitarnos para ampliar os nosos coñecementos. A cuestión é que non viñeron sós. Trouxeron vermes de seda e deixáronnos unha chea en adopción responsable.

As aprendizaxes dos nenos e as nenas ao redor dos vermes de seda son practicamente infinitos. O compromiso adquirido para o seu coidado, o vocabulario necesario para clasificalos e describilos, a paciencia para poder observar a súa metamorfose…

Encántanos transmitir a idea de como uns seres tan pequeniños que parecen non facer máis que comer e tecer producen un dos materiais máis prezados e delicados do mundo.

Moitas GRAZAS, familia, polo voso tempo e por eses adorables bichiños!!!

PROXECTO COMPETENCIAL: O OBXECTO MÁXICO

 

Se queres deseñar unha actividade que triunfe en educación infantil tes dúas opcións que nunca fallan: as mesturas que se poden amasar (canto máis sucias e pegañentas mellor) e os elementos da natureza (pedras, paus, follas, bichos…)

“O Obxecto Máxico” une ambas. Unha mestura de fariña, sal, auga e colorante que enmarca follas secas ou pétalos de flores recollidos na contorna escolar.

O resultado: un amuleto protector que cada neno e cada nena pode conservar na súa casa para lembrar que as cousas máis simples son case sempre as máis fermosas.

Encontro Club de lectura Rede Bibliotea

 Onte, 27 de abril, participamos na xuntanza de clubs de lectura dos colexios e institutos de Ponteareas, Rede Bibliotea. O alumnado participou en diversos obradoiros rotativos de diferentes temáticas e recital de poesía.

O noso Centro propuxo obradoiros relacionados co proxecto anual de Centro, emocións e arte

Novidades na biblioteca de Leo León

 

APADRIÑAMENTOS LECTORES

Durante a SEMANA ADICADA AO LIBRO na biblioteca de Leo León houbo moita actividade: Leváronse a cabo APADRIÑAMENTOS LECTORES con moitísimo éxito.

Os nenos e nenas compartiron libros  durante o tempo de lectura pero non so eso, tanto padriños como apadriñados intercambiaron cartas, manualidades e tarxetas  feitas con moito agarimo e que de seguro serán un gran recordo.

23 de abril - DÍA DO LIBRO

Seguimos pirateando no Feliciano Barrera. Hoxe, 23 de abril, día do libro, o alumnado disfrutou dun contacontos moi pirata por parte de Lalá Teatro. 

Colaboraron en equipo coa pirata Nina para atopar o tesouro, superando probas e  aventuras na nosa biblioteca e atopando contos que eles mesmos crearon.

FELIZ DÍA DO LIBRO

OS LIBROS TESOURO DOS NENOS E NENAS DO FELICIANO BARRERA POLA SEMANA DO LIBRO

Non hai maior tesouro que un bo libro. Xa o saben moi ben tódolos nenos e nenas do noso cole.

Pensaron no seu libro tesouro, ese co que disfrutan moito e que lerían milleiros de veces, reproduciron a portada e escribiron os datos do autor e ilustrador. 

Quedáronlles uns libros tesouro de moito valor ata que… chegaron os piratas!

Eses piratas axudantes da biblio de Leo León percorreron as aulas co seu cofre en busca dos  tesouros pero… tranquilos! Leváronos a bo recaudo. Atópanse na nosa biblioteca, agora si, tódolos tesouros están baixo vixilancia do mellor gardián de biblioteca, Leo León.

SEMANA DO LIBRO

 Exposición de libros para conmemorar a semana do libro.

LECTURAS COMPARTIDAS

 

Todo un clásico xa no programa de actividades do Feliciano Barrera cando se achega o día do libro!

Ao alumnado de 3º, 4º 5º e 6º de primaria asignóuselle un neno ou nena de infantil ou do primeiro ciclo de primaria como afillada ou afillado lector.

Na hora da lectura os padriños e madriñas escolleron un lugar agradable do patio e leron un conto ao seu encantado público. Toda unha semana para afondar nos intereses dos máis pequenos e pequenas e practicar a lectura en voz alta.

Propoñemos esta actividade cada ano porque SEMPRE, SEMPRE, SEMPRE, é todo un éxito!

ARTE GALEGA

 

O alumnado de 5º de primaria, na súa clase de Proxecto Competencial, estivo a investigar a obra de artistas galegos e galegas de diferentes disciplinas: pintura, arquitectura, música…

Para expoñer os resultados das súas investigacións crearon un lap book interactivo que todos os nenos e nenas poden consultar.

Dentro vídeo!!!

PAPIROFLEXIA CANINA

 

Por desgraza, non nos referimos a figuras de papel feitas por cans e cadelas; senón a cans e cadelas feitas con papel.

É máis complicado do que parece! Os nenos e nenas de educación infantil poden explicárvolo estupendamente!

Observade como, na súa imaxinación, non son tan raros nin os cans verdes nin as cadelas azuis!

Que bo traballo, tanto para exercitar a motricidade fina como a capacidade de concentración e a percepción visual.

Selección de libros sobre piratas

 Durante esta semana podedes atopar na biblioteca de Leo León unha bonita selección de contos piratas, moi relacionada coa historia que Noelia, a contacontos máis famosa do CEIP Feliciano Barrera, relatará o mércores a todo o alumnado do cole.

Os rasgos da nosa compañía

Dende “Un cofre cheo de paixón” queremos lembrar que non todos somos iguais. Cada un ten o seu propio físico, carácter ou diferentes emocións.

Non ser como os demais dá igual, o importante é que ti te sintas cómodo tal e como es. Non intentes cambiar polo que outros che digan porque, lembra, NON SOMOS IGUAIS!!!

Todos somos diferentes, iso é o que nos fai especiais a todos.

Na nosa compañia de ópera, estivemos investigando sobre rasgos físicos, rasgos de carácter e emocións.

Vós téndelo claro?

 

AS NOVAS COUSAS DA MALETA

Dende Un Cofre Cheo de Paixón Compañía de Ópera, temos nova información!
Fixemos novos avances na nosa maleta da compañía, temos novos xogos, retos e metáforas.
Xogos como: Bartolo, río de miradas, o vento sopra ...
Metáforas como: As tres pedras máxicas, o folio engurrado, contos, Olelé, cancións ...
Retos como: A cadeira baleira, números, esposados, acordo de xestos ...
Pronto teremos máis información.
Seguimos avanzando, seguimos aprendendo!

 

Olelé

 

 Olelé foi unha das cancións deste curso.

A canción forma parte dun conto. Nós adaptamos unha pequena parte do conto Olelé para representala. Así practicamos para a ópera do curso que ven e imos aprendendo cousiñas.

Esta vez, o traballo repartímolo así:

1. Rexiduría: Aleix e Cata.

2. Escenegrafía: Dylan, André e Lara Filgueira.

3. Músicos: Anxo, Jorge e Pablo.

4. Interpretes: Lara Porto, Giulia, Ricardo, Marcos e Amber.

Foi un gran éxito. Ás persoas que viñeron a vernos á nosa aula gustoulle moito.

 

 

SESIÓN COMPARTIDA ENTRE O ALUMNADO DE 4º E O ALUMNADO DE INFANTIL

 Os nenos e nenas de infantil queren pescudar sobre insectos e tiveron a idea de preguntarlle ao alumnado de 4º de primaria.

Os maiores estiveron encantados de compartir os seus coñecementos cos compañeiros máis pequenos: explicaron datos, responderon preguntas e compartiron libros sobre insectos escollidos da nosa biblioteca.

Que bo momento pasaron todos, grandes e pequenos. Aprender así, dá gusto!

A PEOR XOGADA

 

Non é necesario esperar o Día da Paz, nin á semana de actividades contra o acoso escolar, nin a ningunha outra data sinalada. A filosofía e cultura da non violencia debe fomentarse no día a día.

Os nenos e nenas de 6º de primaria cántannos en lingua galega e de signos que a violencia non é unha opción, que sempre é a peor xogada.

Colaboremos na prevención, detección e intervención en calquera tipo de violencia. A tarefa é demasiado grande para levar a cabo só no fogar ou só na escola!

MOSAICOS INFANTÍS

 

Que fermoso traballo fixeron en educación infantil: mosaicos de cores e mosaicos de palabras.

Sabemos que o todo é moito máis que a suma das partes. Nun mosaico cada peza é distinta, unhas fermosas e outras non tanto. Tamén unhas palabras son máis agradables que outras.

Nun mosaico, como na vida, todas e cada unha das pezas, sexan como sexan, son importantes.

O RELOXO SINCOPADO

 

“O Reloxo Sincopado” é unha famosa peza de Leroy Anderson.

No vídeo vemos como o alumnado de 3º de primaria reproduce o seu alegre ritmo rebuldeiro con diferentes instrumentos.

Pulso, coordinación, estrutura musical… Son só algúns dos conceptos musicais que traballaron con esta peza. Por suposto, sen esquecernos das síncopas.

Canto traballo e canta beleza no tic tac dun reloxo!!!

COMO NACE A CIENCIA?

 

Grandes pensadores e pensadoras propuxeron diferentes pais e nais para a ciencia: a curiosidade, a experiencia, a imaxinación…

En 6º de primaria, sempre tan orixinais, atoparon unha nova proxenitora para o coñecemento científico: a preguiza.

Por que esforzarse tanto para inchar globos cando podes facelo empregando unha reacción química entre vinagre e bicarbonato de sodio? Razón non lles falta!

Podedes ver nas imaxes o proceso empregado no seu experimento, exemplo claro dunha boa aplicación do método científico.

A vinganza

Imos ensinarvos unha canción que fixemos coa inspiración dun libro chamado A Señorita Bubble, un libro que lemos no club de lectura e que recomendamos moito.

Fixemos a canción con unhas campás e coa nosa voz. Foi un traballo moi divertido, esperemos que vos guste!

 

 

O NOSO PROXECTO SOBRE O LIBRO "A SEÑORITA BUBBLE"

Na clase de 5º fixemos uns poemas sobre este libro que tanto nos gustou, onde dúas irmás escapan do colexio para vingarse da Caniche e da Bulldog.

A partir deses poemas, fixemos unhas cancións que, en diferentes publicacións vos ensinaremos.

O noso grupo está formado por: Amber, Jorge e Lara F.

A nosa canción ten moito ritmo e dan ganas de bailala toda a tarde. Cando a escoitedes ides alucinar en cores (dende o noso punto de vista).

Os instrumentos que usamos foron: As campás que nos chegaron do Teatro Real de Madrid.

Esperamos que vos guste.

 

Lectores Bubble

Este poema / canción está feito por Anxo, Giulia e Catalina.

Ao principio custounos un pouco pero, pouco a pouco logramos rematalo. Usamos as campás de instrumento formando unha melodía para o poema / canción.

Gustounos moito o libro da Señorita Bubble. Recomendámolo.

Pasámolo xenial facendo este proxecto do libro que lemos.

 

O Flash Bubble.

Para este traballo tivemos que poñernos en grupos e crear unha canción dende cero. Fixemos a letra e a música nós sós.

Utilizamos para facer o fondo: campás, os pés e uns bolígrafos.

Nesta canción traballaron: Dylan, Lara Porto, Pablo e Aleix.

Para creala tivemos que buscar rimas coas cousas que pasaban no libro.

Gustounos o libro. Recomendámolo moito.

 

RetARTE: ABRIL

Novo reto para un novo mes!!!

Buscamos unha ceramista galega. A súa obra, de vibrante orixinalidade, lévanos a un mundo de soños cheo de tenrura e de imaxinación.

Xa sabedes de quen vos falo?

CRUZ VERMELLA NA ESCOLA: O IDADISMO

 

O xoves pasado, todo o alumnado do centro, dividido en quendas ao longo da mañá, asistiu a un interesante obradoiro impartido por persoal de Cruz Vermella.

Nunha primeira parte explicaron a nenos e nenas en que consiste Cruz Vermella, que servizos ofrece e a que persoas, quen pode ser voluntario e voluntaria…

Na segunda parte trataron o tema principal da actividade: o idadismo. Este concepto engloba todos aqueles estereotipos, prexuízos e formas de discriminación baseadas na idade.

A sesión foi moi práctica. Nenos e nenas; empregando diferentes recursos como pesos, luvas ou lentes específicas para a actividade; sentiron nos seus propios corpos a sensación de pesadez, de rixidez nas articulacións, de dexeneración visual… que case sempre a idade avanzada trae consigo. Un marabilloso exercicio de empatía!

Pero a actividade non se centrou soamente nas limitacións de anciáns e anciás, senón en todo aquilo que poden facer, como deporte adaptado ás súas capacidades e, si, tamén, utilizar con autonomía as novas tecnoloxías. Como exemplo, o alumnado participou nunha vídeo chamada con Antonio, que lles demostrou sobradamente que ser unha persoa maior non implica non usar eficazmente as novas tecnoloxías en vida cotiá.

Moitas grazas a Cruz Vermella pola vosa visita. Desmontastes moitos prexuízos no Feliciano Barrera!!!

MENTES NOVAS, IDEAS NOVAS

 

Onte o alumnado de 5º e 6º de primaria recibiu a visita dunha das dinamizadoras do grupo Mentes Novas.

Mentes Novas é un grupo de participación infantil e adolescente de Ponteareas. É unha canle fundamental para recoller as opinións e inquietudes dos máis novos e novas e darlles voz nas decisións que afectan á vida na nosa vila.

Agora teñen claro que é Mentes Novas, quen pode participar, que actividades organizan…

Tamén tiveron a oportunidade de participar nunha asemblea e propoñer melloras para espazos comúns, como A Freixa ou o Parque das Pombas.

Moitas grazas pola visita e pola vosa labor! Valoramos moito que o noso alumnado teña acceso a espazos de reflexión, creación e diálogo como os que propoñedes.

LAND ART INFANTIL

 

O Land Art emprega elementos da natureza na creación das obras artísticas.

En educación infantil fan arte con follas secas, piñas, ramas, area… Son obras efémeras, un refacho de vento ou unhas pingas de choiva fanas desaparecer. Por iso mesmo son tan fermosas!

Un exemplo perfecto de como os procesos creativos poden ser, polo menos, tan importantes como os produtos.

MÁIS ALÓ DA LECTURA

 

A lectura é unha das aprendizaxes máis complexas e fascinantes que se desenvolven ao longo da infancia.

Desde a relación entre letras e sons ata a comprensión de textos completos hai todo un mundo por descubrir.

No Feliciano Barrera entendemos a comprensión lectora como unha habilidade para a vida, máis que unha habilidade académica. Por iso traballamos con materiais reais que podemos necesitar en contextos cotiáns: folletos de supermercado, horarios dun cine, mapas…

Ler e comprender o que se le non é suficiente no contexto actual. A información debe ser procesada, analizada… Non é o mesmo un feito que unha opinión e a intención do autor ou a autora non sempre é clara. É tan boa como parece esa oferta? É este videoxogo adecuado para a miña idade? Chego ao cine se collo este autobús?

Ás capacidades de ler e comprender é necesario engadir as de reflexionar e cuestionar para que o proceso lector sexa completo!

A AUGA É VIDA

O alumnado de 1º, 2º, 3º e 4º de primaria visitou este martes a ETAP e a EDAR, ambas as en Ponteareas.

Se estes nomes non vos din nada seguro que os nenos e nenas saberíanvolo aclarar moi ben: a ETAP é a Estación de Tratamento de Auga Potable e a EDAR é a Estación Depuradora de Augas Residuais.

Estes conceptos e moitos outros explicóunolos marabillosamente o amable persoal das estacións. Chegamos ao colexio sabendo moito máis sobre a importancia da auga, da súa limpeza, do seu coidado… Un paso adiante no desenvolvemento dunha maior conciencia medioambiental. Moitas grazas!!!

Tamén queremos agradecer ao Concello de Ponteareas a programación e financiamento da actividade. Esperamos poder seguir coñecendo máis segredos da nosa vila!

ARTS: OUR FAVORITE WOMEN

 

Por fin chegou a primavera e, con ela, abríronse camiño nos corredores do colexio unhas flores moi especiais. Son comprensivas, son alegres, son divertidas, son fortes… e representan as mulleres que o noso alumnado considera máis importantes na súa vida. Teñen a sorte de poder contar con elas!

A súa pequena homenaxe!

ARTE MESOZOICA

 

Vese que os dinosauros de Guláns son máis fortes do normal e non se renden á extinción.

En educación infantil aínda podemos ver imaxes adornando portas e paredes co estilo colorido de Piet Mondrian. Uns cadros preciosos!

Tamén, detalle dunha das familias, os nenos e nenas decoraron dinosauros de pasta de modelar. Non sabedes o contentos e contentas que marcharon para casa o día que os levaron! Moitas grazas!!!

MARZO: MES DA EMPATÍA E AMIZADE

 No último mes do trimestre na biblioteca de Leo León traballamos arredor da empatía e amizade. Observamos obras clásicas como "Os xogadores de cartas" de Cézanne, e obras máis contemporáneas como "O abrazo" de Genovés, ademáis tamén incluímos a película "Do Revés" (Inside Out) de Disney como exemplo de amizade e entendemento das emocións.

Por outro lado, como marzo é o mes adicado a poesía o alumnado que se achegaba á biblioteca puido crear pareados coas emocións traballadas este mes: empatía e amizade, ademáis de crear a súa propia Illa da amizade, reflexionar sobre diversas emocións e crear de xeito artístico un símbolo que represente un abrazado.

Rematado o mes remata tamén o trimestre. Esperaremos a abril para seguir navegando por outras emocións e obras de arte. Seguiremos informando!

FAMILIAS NA ESCOLA: MARTIÑO

Que mellor maneira de celebrar un aniversario no colexio que coa visita de papá e mamá? Martiño ten moi claro que non hai ningunha!

Cristal e Pedro seleccionaron, ademais, un conto marabilloso para os nenos e as nenas de infantil, “Vivan as uñas de cores!”. Preciosa historia de como podemos facer aquilo que nos gusta desafiando prexuízos e patróns de xénero que, por desgraza, aínda existen.

Como guinda para o pastel, todos os nenos e nenas que así o quixeron puideron pintarse as uñas das súas cores favoritas.

Moitas grazas, Cristal e Pedro, por visitarnos unha vez máis e regalar a educación infantil unha fermosa xornada!!!

14 DE MARZO: DÍA DO NÚMERO PI

 

Seguro que moitos de vós non o sabiades (como eu ata fai cinco minutos) pero é certo: o número PI ten o seu propio día no calendario, o 14 de marzo.

En 6º de primaria aproveitaron a ocasión para descubrir e analizar o misterioso 3,1416 etc, etc, etc. Como? Nada de lapis, papel e complicados cálculos esta vez!

Con aros, cordas, xices e cintas métricas transformaron o patio cuberto nun laboratorio matemático e comprobaron como dividindo o perímetro dun círculo entre o seu diámetro sempre, sempre, sempre nos vai a dar 3,1416 e todos os decimais que queiramos engadirlle.

Experiencias sinxelas para comprender conceptos complexos. Bo traballo!!!

HENRI MATISSE LOVERS

 

Hai artistas que conectan moi ben co público infantil e coa súa forma de percibir o mundo. Henri Matisse é un deles.

Pintor vangardista onde os haxa, reivindicou a liberación da cor e a simplificación da forma como sinais de identidade propias.

As súas cores expresan emocións intensas. As súas obras son un canto á alegría, ao optimismo, á liberdade, á espontaneidade… Así queremos que sexa o mundo para os nenos e nenas!

Nas clases de plástica bilingüe todo o alumnado de primaria participou individual e colectivamente na nosa pequena homenaxe ao artista.

Os corredores do colexio son pura cor e alegría. Que mellor forma de esperar a primavera!

GUAAAUUUU!

 

Non hai mellor maneira de expresalo!

Onte visitáronnos Iris e Mónica, dúas voluntarias da Asociación Protectora de Animais Os Biosbardos. Con elas trouxeron á indiscutible protagonista do día, Lola, unha marabillosa cadeliña que, por certo, ESTÁ EN ADOPCIÓN e non pode ser máis adorable.

Iris e Mónica explicaron ao alumnado de 5º e 6º de primaria unha chea de conceptos relacionados coa súa experiencia diaria: cales adoitan ser as causas do abandono de animais (causas, non xustificacións, que non existen!); a importancia da esterilización, especialmente no control de colonias de gatos; o lector de chip e as súas funcións…

Estamos moi agradecidos e agradecidas pola súa visita, pero tamén polo seu inmenso labor no coidado e protección dos animais. As tarefas do voluntariado de Os Biosbardos son innumerables: alimentación; hixiene de animais e dos espazos que ocupan; desprazamentos á clínica veterinaria ou a casas de acollida; recollida de animais sen fogar; control da medicación cando a necesitan; eventos para conseguir financiamento; organización de quendas e paseos; educación e socialización… Seguro que deixo algunha atrás. De novo: GRAZAS!!! Déixovos en ligazón á súa páxina web: protectoraosbiosbardos.org

Tamén temos que agradecer á nosa familia educativa todas as súas doazóns para a Asociación. Durante tres días recollemos innumerables achegas. MOITAS GRAZAS a todos e a todas!

Podemos dicir con orgullo que o Feliciano Barrera é un colexio amigo dos animais!