Club de lectura "Os cans lectores" de 6º de primaria

 Este tercer trimestre lemos no Club de Lectura de sexto o libro da Señorita Bubble, de Ledicia Costas. Como actividade complementaria á lectura, fixemos de maneira individual a ficha postlectora e, de maneira grupal, este mural que contén elementos da narrativa e demais datos do libro.

EXCURSIÓN FIN DE CURSO 2026

 

Toda a vida preguntándonos se somos máis de monte ou de praia e resulta que non fai falta escoller: monte pola mañá, praia pola tarde! Así organizamos a excursión de fin de curso no Feliciano Barrera.

Comezamos a xornada no autobús, que aínda que non o pareza, é unha parte fundamental da viaxe.

Despois dun número moi razoable de “cando chegamos” e “falta moito”, conquistamos a alameda de Aldán para o almorzo e os primeiros xogos no parque.

Continuamos coa visita ao Bosque Encantado. Os monitores e monitoras tiñan preparado para nós un xogo de pistas cun obxectivo en común: ser os gardiáns e as gardiás do bosque.

Para o xantar regresamos á Alameda. Este curso, sen dúbida, as poupetas son tendencia.

Por fin, o momento máis esperado: xogos na praia, baños de mar (e de area, sabémolo)

Unha xornada marabillosa, ao máis puro estilo Feliciano: con espazo para a actividade intensa, pero tamén para o relax en contacto coa natureza. Todos e todas puideron desfrutar ao seu xeito!!!

FIGURAS MUSICAIS

 

De figuras musicais imos sobrados e sobradas en primeiro de primaria. E non nos referimos só a brancas, negras e corcheas!

Se alguén pensa aínda que aprender linguaxe musical é aburrido é que non coñece á profe Neli. Por sorte, en primeiro de primaria, poden desfrutar ao grande das súas clases mentres aprenden a orientarse no espazo, a manter o equilibrio, a coordinar o seu corpo… e, por suposto, a duración das distintas figuras.

No vídeo podedes ver un claro exemplo!

XOGADE: FÚTBOL SALA E BALONMÁN

 

O martes pechamos outro capítulo do curso 2025-2026: o deporte escolar. Pouquiño a pouquiño, capítulo a capítulo, imos rematando o libro…

Literalmente, estes partidos xogámolos na casa. Na pista da Avisoureira desfrutamos do fútbol sala e do balonmán con (non contra) o CPR Plurilingüe “A Inmaculada”. Despois compartimos un merecido descanso e xantar, que familias do centro tiveron a amabilidade de preparar. Moitas grazas!!!

Non nos cansaremos nunca de felicitar ao alumnado de ambos centros polo seu comportamento, sempre exemplar. Os valores que ensina o deporte non son doados de adquirir con outras actividades e iso nótase.

Parabéns a todxs xs participantes. Esperamos poder seguir sendo anfitrións e anfitrioas deste fermoso evento.

MAIO: CALMA E SERENIDADE

Rematado o mes de maio chegamos ao final deste proxecto cheíño de arte e emocións, emocionarte.

Neste último mes de maio adicámoslle tempo á calma e á serenidade coas obras de Os nenúfares de Monet,  A xoven da Perla de Vermeer, A dama do armiño de Leonardo Da Vinci e en escultura, O gran Buda de Kamakura. 

Entre as propostas deste mes tiñamos a montaxe dun nenúfar, modelar un Buda en plastilina e algunhas mandalas que nos levaron a tan ansiada calma.

PREMIOS RETARTE

 

Como todas as cousas boas da vida (e as malas, afortunadamente) todo chega ao seu fin.

O Proxecto Retarte deunos grandes momentos este curso. Cada mes, un novo reto aparecía nas aulas do centro. Cada mes, unha oportunidade para investigar e descubrir parte da multitude de grandes artistas que temos nesta terra.

Música, pintura, arte, cine… non existe disciplina sen firma galega e o noso alumnado é agora un pouco máis consciente diso.

Onte entregamos uns pequenos agasallos a todas e todos os participantes no proxecto. Tamén repasamos o nome dxs protagonistas de cada mes e puidemos observar, con moito orgullo, como os nenos e nenas lembraban a maioría dos seus nomes.

Parabéns ao Equipo de Dinamización da Lingua Galega por esta fermosa proposta!!!

LÓVA EN PRÁCTICAS

“Un Cofre Cheo de Paixón Compañía de Ópera” segue avanzando a pasos de xigante no desenvolvemento das distintas profesións LÓVA.

Para aprender a xestionar a presión que exerce o público estiveron a practicar co alumnado de educación infantil.

Seleccionaron os tres contos que máis lle gustaban a eles e elas cando cursaban a etapa: Cocorico, Os Tres Porquiños e Corre, Corre, Cabaciña.

Escribiron o guión, caracterizaron e interpretaron aos personaxes, procuraron os materiais necesarios… Os nenos e nenas de educación infantil desfrutaron moito co seu traballo.

Parabéns!!!

ALERTA BICHOS!

En educación infantil continúan entusiasmados e entusiasmadas co seu último proxecto: os insectos.

Non hai bicho en Guláns que se escape á súa curiosidade nin á súa lupa. Por suposto, nin se lles pasa pola cabeza facerlles dano, pero talvez os estean angustiando un pouco con tanto amor… En fin, que os sufridos animaliños emigran buscando tranquilidade…

Os que viven a corpo de rei son os vermes de seda. Entre que non teñen demasiado movemento e que están a comer moreira fresquiña todo o día, cada vez están máis gordiños. Moitos deles xa empezaron a fiar o seu capullo de pura satisfacción.

Apaixonante o mundo animal e fascinante a aprendizaxe dos máis pequenos e pequenas en contacto coa natureza.

Moi bo traballo!

XOGOS POPULARES EN SALVATERRA

O alumnado de 4º de primaria desfrutou onte da xa tradicional xornada de xogos populares no parque de A Canuda. Hoxe foi a quenda do 5º e 6º curso.

Ambas xornadas, asolladas e calorosas, lémbrannos que o verán está preto e que o curso escolar chega ao seu fin.

Aproximadamente 300 nenos e nenas rotaron polos distintos xogos: chave, zancos… demostrando, unha vez máis, que os xogos de sempre aínda triunfan e que a infancia continúa desfrutando da natureza e do movemento.

O noso máis sincero agradecemento ás persoas que, coa súa dedicación e esforzo, fan posible esta actividade cada ano!

 

PROXECTO: AQUÍ NON SE TIRA NADA!

 

En 5º de primaria están a aprender a aplicar as 3 R do Medio Ambiente: Reducir, Reutilizar e Reciclar.

Apropiáronse das caixas baleiras dos folios para crear caixóns de almacenamento para a aula de música. Parecen de deseño!

O máis importante é que aprenderon unha valiosa lección: Un obxecto non ten que ser novo para ser fermoso e práctico. Ademais, cando lle asignamos, como fixeron eles e elas, unha nova funcionalidade ou unha nova estética, estimulamos a creatividade e a capacidade de aprender “facendo”.

Bo traballo!!!

BEGOÑÍSIMA

 

Este ano o Día das Letras Galegas, como xa sabedes, está dedicado á destacada escritora e activista Begoña Caamaño.

O alumnado de 2º de primaria investigou a súa biografía a través da canción “Begoñísima”, de Uxía e Malvela.

Por suposto, aproveitaron a ocasión para practicar a lectura e mellorar a súa comprensión. Como produto final: un divertido libro de pasatempos con actividades centradas en datos sobre a autora.

Bo traballo!!!

LETRAS GALEGAS 2026

 

En galego fala o mar, en galego fala a choiva, en galego fala a antiga casa de pedra… Que fale en galego a escola!

Pasamos o ecuador dunha semana dedicada ás nosas letras.

Co lema “O galego, unha lingua máis no mundo” inauguramos a exposición do libro “O principiño”, traducido a unha chea de linguas distintas. Moitas grazas á familia de Petra, Martin e Oliver, por prestarnos a súa colección. Coidarémola coma se fose nosa ou máis!

Unha das actividades estrela este curso foi a xornada de baile tradicional. Da man de Erica Iglesias todo o alumnado do centro puido aprender e practicar a nosa fermosa danza. Todo un éxito!!!

FEIRA DOS MINERAIS DE GULÁNS 2026

 

Do 8 ao 10 de maio celebrouse a Feira de Minerais de Guláns e, en educación infantil, que non deixan pasar ningunha ocasión para saír a coñecer mundo, decidiron visitala.

Observaron con curiosidade os 13 expositores de minerais, xemas, xoiería e mesmo fósiis. Fixeron moitas (moitas moitas) preguntas e regresaron ao colexio cunha aventura máis que contar.

Por certo, pórtanse tan ben que dá gusto ir eles e con elas a calquera sitio!!!

CORPUS NO COLE

 

Como aperitivo de unha das celebracións máis emblemáticas de Ponteareas, sempre programamos no colexio un MiniCorpus no que os máis pequenos e pequenas aprenden as técnicas básicas dos nosos alfombristas con máis experiencia: deseñar, debuxar, esfollar as flores…

Nesta ocasión foi o alumnado de educación infantil e primeiro ciclo de primaria o que participou na nosa pequena tradición. Nas imaxes podedes ver o resultado do seu bo facer.

Moitas grazas ao Concello de Ponteareas por organizar esta fermosa actividade un ano máis!!!

FAMILIAS NA ESCOLA: ELIOT E SAÚL

 

Como nos gusta que as familias nos presenten aos seus novos membros!

A nai de Eliot visitou educación infantil co pequeno Saúl, protagonista indiscutible da xornada. Cos seus ollos como pratos cheos de curiosidade escoitou á súa nai contar dous contos sen dicir nin mu. Parece moi moi moi tranquilo, pero quen sabe, ás veces as aparencias enganan… O que si temos claro é que pode aprender moitísimas cousas do seu superirmán maior.

Moitas grazas pola visita, os nenos e as nenas desfrutaron moitísimo con vós!!!

CINEFÓRUM INFANTIL: "NON XOGUES COMIGO"

O pasado 2 de maio conmemorouse o Día Mundial Contra o Acoso Escolar e aproveitamos a ocasión para falar do tema co alumnado de segundo e terceiro ciclo do primaria.

A escusa foi un cinefórum. Vimos a curtametraxe “Non Xogues Comigo” e analizamos, tanto as situacións expostas, como as emocións e os pensamentos de cada personaxe. 

Falamos de empatía, de amizade, de compañeirismo, de bromas aceptables e inaceptables…

Esperamos contribuír a que, cada vez, sexamos máis sensibles e intolerantes co acoso no Feliciano Barrera: NON son cousas de nen@s e SI teñen importancia!!!

Como sempre, agradeceremos toda información ou proposta que queirades transmitirnos en relación cunha convivencia positiva e inclusiva no centro.

NUN PAÍS MULTICOLOR...

O venres 8 de maio celebrouse unha nova edición da Feira das Ciencias de Ponteareas. Tema: o marabilloso mundo das abellas.

Alumnado de 6º de primaria atendeu moi ben o seu posto, centrado na elaboración artesanal de velas.

Ademais, informaron a todas as persoas que así o quixeron de conceptos tan interesantes como a anatomía das abellas, o ciclo da súa vida, a importancia que teñen para o ser humano… Un gran traballo!!!

Moitas grazas a todos e a todas as que vos achegastes á Praza de Abastos a arroupar ao noso alumnado.

Grazas tamén, por suposto, ao Concello de Ponteareas por organizar esta actividade un ano máis!!!

 

Club de Lectura "Os Curriños"

Nestes último trimestre, os nenos e nenas de 2° estamos levando a cabo un Club de Lectura xunto cos alumn@s de 2° do CEIP Mondariz - Balneario. "Curriño", que así se chama o libro, xa nos propuxo un reto antes de comezar a lectura: grabarnos un video para poñernos cara e coñecernos. E nós que somos moi ben mandadiños, puxémonos mans a obra co noso video. Que vos parece?

Agardamos ter pronto novas noticias de Curriño e novos retos.

VAI DE MUSEOS

 

Pechando xa o proxecto competencial de 4º de primaria, o alumnado preséntanos os tres museos nos que estiveron traballando por equipos: O MUSEO DO PRADO, O MUSEO DO LOUVRE e O MUSEO DE VAN GOGH. Unha vez seleccionado o museo no que querían traballar, pescudaron datos sobre localización, antigüidade, prezo da entrada, días de apertura... Máis tarde seleccionaron tres obras da colección de cada museo e puxéronse mans á obra para pescudar autor, data, materiais, técnica, interpretación...

Uns auténticos investigadores de arte, quereres saber máis? Achegádevos aos seus lapbooks para coñecer os seus traballos.

SPRING ART

 

Corazóns, tulipáns, margaridas, paxaros e bolboretas enchen de luz e de cor fiestras e corredores no Feliciano Barrera.

Ás clases de Plástica Bilingüe chegou a primavera e fíxoo ao grande! Os nenos e as nenas de primaria exploran as súas habilidades manuais e creativas mentres aprenden novo vocabulario. O alumnado de 6º aproveitou tamén para crear os obxectos e a decoración necesaria para as súas exposicións na Feira das Ciencias de Ponteareas.

Hello, spring!!!

RetARTE MAIO

 

Último RetArte do curso!

Nesta ocasión non buscamos a unha, senón a dúas artistas galegas. Os seus nomes dámosvolos como pista: María e Sara.

Como se chaman cando actúan xuntas?

Respondede, como sempre, na caixa de correos de Leo León!

X CAMPIONATO DE AXEDREZ FELICIANO BARRERA

 

E xa van 10! Unha primavera máis as neuronas dos nosos nenos e nenas fan deporte no seu ximnasio particular: o taboleiro de xadrez!

Durante os recreos, alumnado de primaria e de educación infantil pon a proba a súa estratexia e capacidade de anticipación.

Nas imaxes podedes ver o debut de dous dos participantes máis novos ante as atentas e silenciosas miradas de alumnado de diversos cursos.

Seguiremos informando!

FEIRA DAS CIENCIAS DE PONTEAREAS 2026

 

Non faltedes mañá a un dos nosos eventos escolares favoritos: A Feira das Ciencias de Ponteareas.

Este ano o tema é inmenso e pequeniño ao mesmo tempo: o mundo das abellas.

Os nosos alumnos e alumnas de 6º de primaria prepararon a exposición con todo o seu agarimo e habilidade científica. Non quero contarvos demasiado, prefiro que vos acheguedes a vela! Só dicir que o produto final é moi cálido e agradable…

IMPORTANTE: Este ano, debido á inestabilidade climatolóxica da primavera toliña que nos tocou, celébrase na Praza de Abastos.

Estaremos alí desde as 17.00 ata as 20.30.

Agardámosvos!!!

STREET DANCE

 

Un ano máis as danzas urbanas encheron o Feliciano Barrera de boa vibra.

Desde 4º de educación infantil ata 6º de primaria todo o alumnado tivo a oportunidade de mostrar as súas habilidades de improvisación e creación en equipo.

Por que practicar baile urbano na escola?

Porque aprender unha coreografía estimula a memoria e a atención. Porque o movemento harmónico do corpo pon a proba e favorece a coordinación e o equilibrio. Porque a danza permite a expresión de emocións a través do corpo….

E, para rematar, pero moi importante: porque é incriblemente divertido e liberador!!!

Moitas grazas ao Concello de Ponteareas por organizar e financiar esta actividade!!!

Arte galega: a cerámica de Sargadelos

O alumnado de cuarto de primaria estivo moi entretido pescudando sobre arte galega e atopouse coa cerámica de Sargadelos: investigaron a súa interesante historia e expuxeron todo o proceso de produción das pezas. Reproduciron algúns dos seus deseños de vaixela e inspiráronse nalgunhas das figuras da marca  de cerámica para modelar as súas propias figuras. Hai moita arte neste grupo!

SOÑA NA HORTA

 

Que importante é o contacto coa natureza en educación infantil!

Remata o mes de abril e chega o momento no que os mestres e mestras damos un paso atrás e deixamos ensinar a outros: á terra, á auga, ao sol…

É o momento de poñer en marcha a horta no Feliciano Barrera!