PLENO INFANTIL NO CONCELLO DE PONTEAREAS

 

Nova sesión preparatoria para o Pleno Infantil no Concello de Ponteareas.

A temática, sen dúbida, xera debate; pero resulta fundamental a día de hoxe: Os nosos dereitos dixitais.

Alumnos e alumnas propuxeron distintas medidas como, por exemplo, a construción dun cíber como espazo seguro de dixitalización ou a creación, por parte do Concello, de aplicacións educativas que non supoñan riscos para os cidadáns e cidadás.

O alumnado de 5º e 6º de primaria segue avanzando na reflexión e na capacidade de poñer palabras ás súas ideas e necesidades.

Parabéns!

CIBERLIGA 2025

 

A semana pasada as nenas e os nenos de 5º e 6º de primaria puxeron a proba os seus coñecementos sobre ciberseguridade na V Edición da Ciberliga.

Tiñan todos os conceptos ben fresquiños despois das sesións formativas do programa Dixitalización sen Límites e notouse.

Non foron os máis rápidos e rápidas nas súas respostas, pero demostraron o máis importante: que teñen ben adquiridos e asentados os conceptos básicos para un uso seguro da internet.

Parabéns a todos e a todas!!!

DIXITALIZACIÓN SEN LÍMITES

 

O xoves pasado os nenos e nenas de 5º e 6º de primaria tiveron a última das catro sesións do programa Dixitalización sen Límites.

Os contidos do programa son, a día de hoxe, imprescindibles para unha formación integral do alumnado: conceptos básicos sobre tecnoloxía; identidade dixital; ciberacoso; vantaxes e perigos da intelixencia artificial; creación de contidos con distintas aplicacións; vídeo chamadas seguras...

Con actividades así é máis fácil iniciarse no mundo dixital con garantías e seguridade. 

Concurso de ciberseguridade

Os nenos e nenas de 5º e 6º de primaria participamos este martes nun concurso de ciberseguridade. A prendemos o que se pode facer eo que non. Como por exemplo que é o que debemos facer cando nos aparece unha mensaxe dun descoñecido, cando nos piden una foto en pixama, cales son as contrasinais seguras ...

Pasámolo moi ben, foi divertido e fixémolo xenial no concurso.

Somos un bo equipo!!

CIBERSEGURIDADE NA BIBLIOTECA

 

Unha axente da garda civil explicou aos nenos e nenas de 5º e 6º de primaria nocións básicas sobre ciberseguridade e boas prácticas na rede.

A tecnoloxía chegou para quedar e por iso é tan necesario ensinar aos nenos e nenas a utilizala con precaución e respecto, tanto a si mesm@s como aos demais. 

Con prevención, educación e acompañamento promovemos un uso san das tecnoloxías da información e da comunicación. 

Ciberseguridade na escola

 As nenas e nenos de quinto de primaria levan semanas preparando a súa participación na segunda edición do concurso Ciberseguridade no Cole. Viron vídeos, reflexionaron, comentaron as súas ideas… Esta semana puideron ao fin poñer en práctica os coñecementos adquiridos e fixérono realmente ben. O máis importante é que son un pouco máis conscientes dos riscos que entraña o uso de medios dixitais e dispoñen de máis ferramentas para afrontalos. Parabéns!!!