TODO ENCAIXA!

 

Os nenos e nenas levan semanas testando un novo material chegado para o noso Polo Creativo. É o Korbo Steam Concept, xogo de gran formato que permite a construción de distintas estruturas e potencia a creatividade científica.

Todo un éxito no Polo do Feliciano Barrera!

PASAXEIROS AO TREN!!!

Un novo material enriquece o Polo Creativo do Feliciano Barrera: O Intelino Smart Train. Tradicional e sofisticado ao mesmo tempo!

En pequenos grupos de diversas idades programamos este tren intelixente para correr sen descarrilar, para facer paradas que non deixen a ningúen en terra, para ir marcha atrás...

Permite practicar unha programación moi simple ou moi complexa, adaptándose á idade e momento evolutivo dos nenos e nenas. Ademais... A quen non lle gusta un tren de xoguete?

 

POLOS CREATIVOS: EXPERIMENT BOX

 

Continúan chegando ao colexio materiais para desenvolver o noso Polo Creativo, que vai xa polo seu terceiro curso consecutivo.

Nesta ocasión trátase da Experiment Box. É unha maleta cun taboleiro con diferentes compoñentes electrónicos tradicionais que responden de distintas formas segundo prográmense os distintos bloques.

O alumnado de 5º de primaria foi o primeiro  en probar. Toda unha experiencia coas novas linguaxes de programación e con elementos tracionais de circuitos electrónicos. 

O Tardo

 

A semana pasada, as nenas e nenos de 6º estivemos gravando este vídeo para participar no XXIII concurso de relato oral "Tíralle da lingua".

O monte de Guláns é un sitio perfecto para gravar, por iso escollemos este lugar, porque en calquera momento podería aparecer o Tardo. 

Custounos moito facer este vídeo pero tamén o desfrutamos.

Ougallá gañemos un premio para poder dedicárvolo a tódalas persoas que nos seguides.   

FESTIVAL EN CATRO ACTOS

 

Novidades!!!

Como algúns e algunhas xa sabedes, o proxecto de centro deste ano son as Artes Escénicas.

As artes escénicas son, fundamentalmente, tres: teatro, danza e música; pero estas á súa vez divídense en múltiples disciplinas como o monicreque, as sombras chinesas ou o circo. 

Resumindo, que decidimos facer un ciclo de artes multidisciplinar no que todo, ou case todo, ten cabida.

Todo o alumnado vai participar, pero para non facer un festival de oito horas e media, dividímolo, como as obras de teatro, en actos:

Acto I: Festival de Nadal.

Formato tradicional. Actúa todo o alumnado.

Acto II: Letras Galegas.

Actuacións de 3º, 4º e 5º de primaria.

Acto III: Xuño.

Espectáculo de 6º de primaria

Acto IV: Fin de curso.

Actúa Infantil e 1º e 2º de primaria e graduamos ao alumnado de sexto de infantil e de sexto de primaria.

Esperamos que ter as datas con antelación (están no cartel) axude ás familias a organizarse e poidan asistir aos distintos actos.

Aínda non temos pechadas todas as disciplinas a traballar e bastantes detalles deste FESTIVAL EN CATRO ACTOS seguen no aire... Só sabemos unha cousa: Será algo MEMORABLE. Seguiremos informando!!!

FESTIVAL DE CANS 2024

 

Un ano máis que paseamos os pezuños polo Cans Voulevar!

Esta vez, o alumnado de 1º, 2º, 3º e 4º de primaria tivo a oportunidade de presentar unha das nosas curtametraxes: "O Cascabel da Gata".

Ademais, os nenos e nenas de segundo subiron ao "escenario" do jalpón para explicar as reviravoltas de produción da gata Benita.

Toda una experiencia!

Visionado de curtametraxes; charla acerca das profesións que se desenvolven ao redor do cine; photocall (photochimpín, mellor dito); percorrido pola aldea...

Agroglamour levamos e agroglamour deixamos!!!

Tedes ata o sábado 25 de maio para visitar o Festival de Cans!

LETRAS GALEGAS 2024

Hoxe o tempo permitiunos ao fin celebrar o Día das Letras Galegas como se merece.

Ademais das actividades realizadas a semana pasada, como o Pasapalabra de Luisa Villalta ou o deseño e elaboración de chapas conmemorativas en Polos Creativos; hoxe engadimos unha Gran Xincana das Letras.

Dez equipos de alumnado mesturado de todas as aulas, liderados por un neno ou nena de 6º de primaria, enfrontáronse a 10 probas relacionadas coa escritora homenaxeada este ano.

Supoño que non fai falta aclarar que todos e todas superaron o reto marabillosamente. É o bo de traballar en equipo!

Ao final, un pequeno premio tradicional: unha buxaina para os nenos e nenas de primaria e ras saltarinas para infantil.

Aínda sabedes facer bailar unha buxaina? Convidámosvos a probar cos vosos nenos e nenas!

 

PROXECTO RECICLAXE

 

En primeiro e segundo de primaria remataron un proxecto moi ambicioso. Propuxéronse poñer en marcha as tres RRR no Feliciano Barrera: Reducir, Reutilizar e Reciclar gran parte dos residuos.

Comezaron investigando nos libros da Maleta Ponte Zero. Préstamo do CEIDA (Centro de Documentación Ambiental Domingo Quiroga) Moitas grazas, por certo!!!

Continuaron etiquetando e fabricando os seus propios contedores para levar despois o lixo aos de fóra. Non importa que chova!

Finalmente, compartiron os seus coñecementos coas demais aulas do colexio concedéndolles a súa insignia de clase ecolóxica. 

Tamén afondaron nalgunhas cuestións grazas á charla de SOGAMA deste luns. Que interesante!

Un gran traballo!!!

A HORA DO CÓDIGO

 

A "Hora do Código" é unha iniciativa internacional que pretende introducir a persoas de todas as idades no desenvolvemento do pensamento computacional.

É un evento organizado por Code.org, unha organización sen ánimo de lucro dedicada a expandir as ciencias da computación na educación.

En sexto de primaria participaron nun dos eventos, aprendendo unha chea de conceptos de programación.

Recibiron un diploma acreditando os coñecementos adquiridos e, o máis importante, gozaron moito da experiencia. 

PROXECTO AVES EN 6º DE EDUCACIÓN INFANTIL

 

Xa sabemos o moito que, en xeral, gustan aos nenos e nenas os animais. Se falamos de educación infantil, podemos dicir que é adoración o que senten por eles. 

Nesta ocasión 6º de educación infantil concentra os seus esforzos nas aves e faino a través de realidade aumentada, tecnoloxía que combina o mundo real con elementos virtuais.

Como alucinaron cando viron ás súas aves saír do papel no que as debuxaron para converterse en figuras tridimensionais, medrar e incluso marchar de paseo.

Unha gran experiencia!

LUZ Y SOMBRA

"Luz y sombra"é o título do poema de Tere Acosta que recita para nós o alumnado de 4º de primaria.

E un texto moi fermoso que fala das dificultades para comunicarse e relacionarse que atopan, nos casos máis severos, algunhas persoas con autismo. Pero non só fala de dificultades; tamén fala de pontes, de tradutores, de mapas para entendernos... En fin, unha beleza de traballo!

Animámosvos a escoitalo.  

Biblioteca Creativa: Máquinas que garabatean

 As garabateadoras son artiluxios motorizados que se moven de xeito inusual e deixan un trazo no seu percorrido. En 5º e 6º de Primaria construímos unha garabateadora con materiais sinxelos, como rotuladores, vasos plásticos, pilas e cinta adhesiva. Puxémolos en movemento coa vibración dun motor cun contrapeso para que xiren, choquen e salten. Experimentamos diferentes montaxes e formas de desequilibrar o motor. Despois de facer probas e investigar cos cambios, compartimos a experiencia nun gran papel continuo, onde probaron as súas máquinas, creando un debuxo en conxunto.

Comprendendo o autismo

 Os nenos e nenas de 3º de primaria, fixeron un gran traballo sobre o autismo. É un traballo cargado de empatía , solidariedade e respecto

Radio Guáns: Frases pola Paz: 1º de primaria

Este curso temos como proxecto: "A Radio". Para celebrar o día da non violencia e da Paz traballamos   podcast e videopodcast baixo o lema "Frases pola Paz. Aquí tedes o traballo de 1º de primaria

 

Radio Guláns: Frases pola Paz: Infantil

Este curso temos como proxecto: "A Radio". Para celebrar o día da non violencia e da Paz traballamos   podcast e videopodcast baixo o lema "Frases pola Paz. Aquí tedes o traballo de infantil