O EQUIPO CAZAPAZ: CONTO PARA O DÍA DA PAZ

 Conto escrito e ilustrado polo alumnado de 2º de Primaria, para a educación na tolerancia, a harmonía, a non violencia e a paz.

PAZ 2023

 Un 30 de xaneiro máis celebramos no colexio o Día Escolar da Non Violencia e a Paz.

Este curso empezamos o programa de actividades dunha maneira un pouco distinta: a paz como algo que comeza dentro de nós e achegamos aos demais.

A través do ioga, todas as nenas e os nenos de infantil e primaria, tentarán ver cara ao seu interior para atopar a paz e a calma que tanta falta fai nestes tempos. Hoxe 3º e 4º de primaria inauguraron as xornadas, mañá será a quenda de 1º. O próximo día 7 de febreiro todo o cole terá saudado ao sol. 

Unha mascota de cine

Este ano, o proxecto do cole é "O cine", e andamos moi atarefados facendo en cada aula un curto que logo estrenaremos nunha gran sesión de cine. Como non pode faltar nada, tamén precisamos unha mascota. Os alumnos e alumnas de 4º de primaria debuxaron diferentes mascotas e o resto do cole votou para elixir unha. Aqui tedes todas as mascotas que se deseñaron

CAMPO A TRAVÉS

 Primeira xornada de competición de campo a través na Avisoureira. Hoxe os nenos e nenas de terceiro e cuarto de primaria mostráronnos a maxia que xorde ao unir meses de adestramento con toneladas de ilusión. Como sempre, foron todo un exemplo de deportividade e de respecto polo adversario. Algo ten que ver o profe Oscar con iso!

En fin, un día precioso para os nenos e nenas, para o profesorado e para as familias que se achegaron a animarnos. Grandes resultados para grandes deportistas: todos e todas remataron a carreira e gozaron dela, que é o máis importante para nós. 

Non esquezades que mañá termina a competición coas carreiras de quinto e sexto de primaria. Non faltedes!

PORTAS ABERTAS!!

 O certo é que as portas do Feliciano Barrera están sempre abertas para quen queira coñecernos, pero este mes de febreiro estarano aínda máis. 

O martes 7 de febreiro ás 16:00h e o mércores 8 de febreiro ás 10:00h temos organizadas unhas xornadas nas que, ademais de visitar o centro, contarémosvos cales son os piares básicos do noso proxecto educativo. Tamén responderemos encantados e encantadas a todas as vosas dúbidas ou inquietudes. Agardámosvos!!!

Agradeceriamos moito que compartísedes esta publicación. Grazas!!!

O relevo de España

Os nenos e nenas de 4º de primaria levan uns días aprendendo o relevo de España, máis concretamente os ríos, montes, cordilleiras, depresións... Para iso, elaboraron un mapa de España facendo os distintos relevos en barro. Deixárono secar, pintárono e levárono a casa para estudar con el. Ademais utilizaron unha páxina web destinada a xogos interactivos relacionados co relevo. Así que utilizaron varios formatos para estudar dunha maneira máis amena. Os resultados foron moi bos

Volve Digicraft

 Lembrades o programa Digicraft? É un proxecto que ten como obxectivo aumentar a competencia dixital das nenas e nenos de entre 6 e 12 anos. Ao mesmo tempo tamén ofrécenlles a posibilidade de descubrir se teñen unha vocación tecnolóxica. 

Cada curso académico os centros poñemos en práctica un itinerario formativo composto por 14 actividades. Este curso, no Feliciano Barrera, centrarémonos na programación. Como sempre; a través do xogo, da comunicación, do traballo colaborativo e, por suposto, a diversión.

A nova biblioteca de Leo León

Este curso, a nosa biblioteca cambiou moito. Grazas ao programa de innovación educativa Polos Creativos e a súa dotación, a biblioteca renovouse xa que esta foi o espazo elexido para levar a cabo dito programa, dotándoa dun equipamento especializado, cun deseño modular e innovador, e organizado didacticamente para o fomento da creatividade e a formación do alumnado nun contexto de aprendizaxe competencial.

Os nenos e nenas gozan moito dos novos espazos e do novo equipamento da biblioteca. Esta ademais, ampliouse un pouco pola parte trasera srvindo nun futuro de espazo de almacenamento de material e para disfrute dos nenos e nenas, ademais de posibles exposicións.

O universo Harry Potter

O martes chegou á  biblioteca un mini Hogwarts feito de cartón, silicona e moito traballo. Ata que dure estará a encher de maxía a biblioteca e o poderán gozar os nenos e nenas nas horas de recreo

Agasallo de Nadal a todas as aulas na biblioteca

Sorpresa na árbore de Nadal da biblioteca. Leo León e o Elfo de Guláns non se esqueceron de nós: cada curso ten un novo xogo de aula! 

 

Nadal na biblioteca

Este ano a nosa biblioteca estrenou decoración. Primeiro, os nenos e nenas de todo o cole adornaron a árbore con bolas feitas de diferentes materiais , formas e tamaños. Despois mercamos unha variada decoración de Nadal que fixo as delicias de todos os nenos e nenas. A nosa biblioteca está a converterse nun lugar moi cálido, cheo de cor e moi divertido onde aos nenos e nenas lles encánta reunirse a xogar, falar e ler.