ACTO IV: ACTUACIÓN... SORPRESA!!!

 

ACTO IV: 1º E 2º DE PRIMARIA

 

ACTO IV: 6º DE PRIMARIA

 

ACTO III: A VERDADE DETRÁS DUN NENO

Proxecto LÓVA: La ópera como vehículo de aprendizaje. 

Laura e María, de 6º de primaria, explican no vídeo, marabillosamente ben, en que consiste o proxecto. 

Rematada a presentación podedes desfrutar da ópera completa. 

 

ACTO II: O COELLIÑO BRANCO

 

Coa súa representación do conto "O coelliño branco" os nenos e nenas de 3º e 4º de primaria demostraron que unha imaxe vale máis que mil palabras. 

Que marabilloso traballo! Esperamos que o gocedes!

II ACTO: A CEBRA CAMILA

 

A estas alturas os nenos e nenas de 3º e 4º de primaria non necesitan presentación. 

Gozade da súa fermosa interpretación de "A Cebra Camila"

II ACTO: O QUERER

Coincidindo coa celebración das Letras Galegas, os nenos e as nenas de 5º de primaria fixeron unha fermosa homenaxe ás nosas cantareiras tradicionais. 

Sen amplificación de ningún tipo, sacaron peito para interpretar unha preciosa versión de "O querer", de Tanxugueiras.

II ACTO: A QUE SABE A LÚA?

Segunda entrega do noso Festival en Catro Actos. Os nenos e nenas de 3º e 4º de primaria demostran que, ademais dos monicreques, tamén dominan a arte do teatro de sombras. 

Que fermoso traballo!

 

II ACTO: OS CHIBOS CHIBÓNS

Aínda estamos coa boca aberta co que fixeron os nenos e nenas de 3º, 4º e 5º de primaria no II Acto do noso Festival en Catro Actos. 
Deixámosvos o vídeo da primeira actuación: Os Chibos Chibóns, interpretado por alumnado de 3º e 4º de primaria. 
Bo traballo!!!

XI Certame de relato curto

 Noraboa Leire, Xoel e Profe Alba por quedar finalistas no XI certame de relato curto.

Os seus relatos están publicados neste marabilloso libro que esperamos ter para ocurso que ven na biblioteca do cole. 

 

ENTREVISTA SI RADIO

O 28 de maio, chamáronnos de Si Radio para facer una entrevista. Deixámosvos o enlace da entrevista por si queredes escoitala.

ENTREVISTA SI RADIO 

Saída Ó Grove de Infantil

 O pasado martes 27 de maio saímos de excursión todo o cole e aquí vos deixamos unha mostriña do ben que o pasamos cos nosos amigos e amigas do cole de Guláns

clic aquí

PRANTAS, CARACOIS E UN CHISQUIÑO MÁIS...

 Nesta ocasión deixamos unha mostriña do que está a acontecer estes días polas aulas de infantil....

CLIC AQUÍ

Ultimas novidades do curso na biblioteca de Leo León

 

O cancioneiro de Guláns nas letras galegas

 Este ano, o día das letras celebráronse ao grande na casa cultural da Avisoureira, onde puidemos gozar de 4 obras de teatro representadas polo alumnado de 3º e 4º de primaria, ademais de disfrutar moito coa copla "Río verde" interpretada por 5ª de primaria.

Ademais, os nenos e nenas de primaria, durante 3 días, na hora de lectura, cantaron as coplas recompiladas por eles mesmos coa axuda das súas familias para crear "O Cancioneiro de Guláns"

TAREFA FINAL DE PATAS AMIGAS

Este ano os nenos  e nenas de infantil participamos no Plan Proxecta, Protexe ós animais. No desenvolvemento deste proxecto aprendemos moitas cousas sobre os animais, pero sobretodo aprendemos cómo coidar das nosas mascotas e neste conto, elaborado por todo o alumnado de infantil, queda claro.
Esperamos que vos guste tanto como nos gustou a nós facelo.

PATAS AMIGAS: KITBULL

KITBULL: unha historia de amizade, loita e esperanza.

 

Na aula de 2º de Primaria tivemos a sorte de visualizar a emocionante curtametraxe Kitbull, unha creación de Pixar que, a través da animación, toca temas tan profundos como a amizade verdadeira, o maltrato animal e a importancia de dar unha segunda oportunidade aos animais abandonados.

A historia céntrase nun pequeno gatiño rueiro, desconfiado e independente, que vive nun vertedoiro, e un pitbull que sofre malos tratos e permanece encadeado nun patio, só e sen liberdade. A primeira vista, semella imposible que entre eles poida nacer unha relación de amizade, pero pouco a pouco, a través de situacións difíciles e cheas de emoción, van construíndo un vínculo baseado no respecto, na axuda mutua e no cariño. 

 

Durante a visualización traballamos varios obxectivos fundamentais:

1-  Identificamos as necesidades básicas dos animais de compañía: alimentación, cariño, atención         veterinaria, liberdade de movemento e compañía.

2- Reflexionamos sobre o que significa o abandono animal e as duras consecuencias que ten para os que o sofren.

3- Sensibilizámonos sobre a importancia de coidar o medio ambiente e respectar os dereitos dos animais.

4- Analizamos o papel que xogamos nós, como nenos e nenas, na loita contra o maltrato animal, a través da empatía, o coidado e a educación.

No conflito da historia, o gatiño ve como o pitbull sofre unha agresión do seu dono. Esa situación convérteo no heroe inesperado: perde o medo e achegase a axudar. Xuntos deciden escapar desa vida de sufrimento e atopar un novo comezo. Tras unha noite á intemperie, durmindo un xunto ao outro, son finalmente acollidos por unha persoa que lles ofrece un fogar verdadeiro e cheo de amor. 

 

Se ti tamén queres coñecer esta marabillosa historia, podes ver a curtametraxe completa a través desta ligazón: Kitbull - Pixar (YouTube)  

 

Despois do visionado, abrimos un espazo de diálogo onde reflexionamos sobre como podemos axudar aos animais abandonados. Algunhas propostas que xurdiron foron:

            -    Adoptar en lugar de mercar.

            -    Non abandonar nunca a un animal de compañía, porque eles tamén senten.

            -    Apoiar os refuxios e protectoras da nosa contorna.

            -    Denunciar situacións de maltrato animal.

            -    Educar desde pequenos no respecto e o coidado dos seres vivos.

Finalmente, elaboramos un mural colaborativo coas nosas investigacións sobre os recursos que existen para axudar aos animais sen fogar e recollimos acordos e ideas que nos comprometen a ser máis responsables e solidarios cos animais. 

Kitbull fíxonos rir, emocionarnos e, sobre todo, pensar. Porque unha historia contada con debuxos tamén pode cambiar miradas e sementar conciencia.

Aquí tedes unha mostrar do noso traballo: 

COMO IMOS?

Os intérpretes están preparando xa as cancións de cada un.

Os músicos xa teñen preparado o acompañamento de duas cancións e están conseguindo a terceira.

Escenografía está facendo os decorados para cada acto da ópera.

Rexiduría está preparando a exposición de todo o proceso de creación da nosa ópera.

Isto parece que vai moi ben!!!

A Verdade Detrás Dun Neno

Xa chegou o gran momento!!

Despois dun curso traballando duro neste proxecto, 12 Estrelas Compañía de Ópera convídavos por fin á súa gran  estrea  " A Verdade Detrás Dun Neno".

Estamos moi emocionados e á vez nerviosos polo que poida pasar enriba do escenario.

Esperámosvos!!!

Tradición oral

As nenas e nenos de 6º fixemos un traballo de composición musical con algunhas das coplas que recollemos alá polo día da lingua materna.

Esperamos que vos gusten.

SAÍDA POLOS MUÍÑOS DA CONTORNA

 A finais do mes de abril puidemos gozar dun marabilloso día de excursión polos muíños de Guláns e tivemos a sorte da nosa parte, pois Pedro, o papa de Martiño puido acompañarnos e Alberto puido axudarnos a ver como funciona un muiño de verdade, con millo e todo!

Moitisimas grazas pola vosa axuda e colaboración!

PATAS AMIGAS: A VIDA SECRETA DAS TÚAS MASCOTAS

 A VIDA SECRETA DAS TÚAS MASCOTAS 

Traballaremos co tráiler da película A VIDA SECRETA DAS TÚAS MASCOTAS. 

 hhps://youtu.be/imqzsiXcxdg?feature=sharedh ps://youtu.be/imqzsiXcxdg?feature=sha red 

 A película ambientarase nun apartamento de Manhahan, onde as mascotas reúnense tras a marcha dos seus donos para contar humillantes historias sobre eles e dar e recibir consellos sobre como ser máis adorables. O líder deles é un Fox Terrier que ve ameazada a súa posición de privilexio pola chegada dun can mes zo. A súa rivalidade levaraos a acabar nas duras rúas de Nova York, onde se atoparán cun aparentemente adorable coello que en realidade é o líder dun exército de mascotas abandonadas que xurou vingarse. Visualizamos o tráiler (dura unicamente 2 minutos). 

Comentaremos a continuación a nivel oral, para posteriormente realizar unhas actividades escritas para traballar os seguintes obxectivos: 

 • Identificar as necesidades básicas dun animal de compañía.

 • Concienciar os nenos/as sobre a protección do medio ambiente e o respecto aos dereitos dos animais. 

 PREGUNTAS PARA TRABALLAR A PARTE ORAL: 

 • Quen pode explicar que é unha mascota? 

 • Que crees que fan as mascotas a maior parte do tempo cando non estás na casa?

 • Cantas horas adoitan pasar moitas mascotas soas en casa? • Como crees que senten durante ese tempo? 

 • Alguén pode contar algunha «trasnada» que fixese a súa mascota mintas non había ninguén en casa. • Por que crees que a xente quere ter mascotas? 

 • Crees que choran os animais? Investiga como chora un gato ou un can cando o abandonan e cóntanolo mañá. 

 • Este Tráiler empeza cunha ironía, estaría ben falarlle aos nenos do que significa e situacións nas que facemos ironías. Despois de traballar a parte oral do vídeo, traballaremos unha ficha escrita que require que o alumnado lembre algunhas das cousas vistas polo que deben prester moita atención.   

Finalmente, o alumando elaborará un pequeno guión para representar con títeres de dedo

CLIC NA IMAXE

FAMILIAS DE INFANTIL NA ESCOLA

 Aquí vos deixamos un pequeno vídeo amosando algunhas das familias que participan no día a día da nosa aula. Coma sempre é un pracer contar con vós.

Os nenos, nenas e profes dámosvos as GRAZAS!

FAMILIAS NA ESCOLA

"As voces de Guláns"

 Este ano para conmemorar o día da muller e a semana da prensa, fixemos entre todos os nenos e nenas do cole un xornal,  cun montón de seccións.

- A editorial foi escrita polo alumnado de 6º de primaria.

- A sección de política polos nenos e nenas de 5º de primaria.

- Unha sección dedicada ás mulleres que cambiaron o mundo, escrita por 3º de primaria.

- Os nenos e nenas de 4º investigaron sobre as mulleres emprendedoras.

- A sección de deportes foi redactada polos nenos e nenas de 2º de primaria.

- Os divertidos pasatempos foron deseñados por 1º de primaria.

- E por último, cun traballo extraordinario, os nenos e nenas de infantil fixeron unha entrevista á profe Neli.

Desde a redacción deste xornal damos a noraboa a todos os nenos e nenas polo gran traballo e ao profesorado por facelo posible.

Semana do libro: "3º e 4º de primaria contando contos a Infantil, 1º e 2º de primaria".

 O venres, os nenos e nenas de 3º e 4º de primaria, prepararon catro contos para o deleite dos máis cativos. Estes gozaron cos contos e as representacións deles. Desde a biblioteca agradecemos o esforzo dos nenos e nenas que prepararon estes contos.Dividimos o espazo en 4 recunchos por donde foi pasando o alumnado de infantil, 1º e 2º de primaria.

Esta actividade gustou moito entre os cativos e cativas máis pequenos.

Semana do libro: Bookface

 Preciosa actividade consistente en fundirse coa portada dun libro. Unha actividade máis para o noso proxecto das artes escénicas: "Festival en catro actos", promovida pola biblioteca para celebrar a semana do libro no noso cole.

Desde a biblioteca de Leo León agradecemos a colaboración das familias e dos nenos e nenas participantes, que fixeron posible este bonito vídeo.

Semana do libro. Apadriñamentos

 O martes e o mércores, na hora de lectura tiveron lugar os apadriñamentos lectores, unha actividade coa que gozan pequenos e non tan pequenos no cole. A actividade consiste en que os nenos e nenas de 3º a 6º de primaria, son padriños e madriñas dos nenos e nenas de infantil, primeiro e segundo. Con eles e nun recuncho do no cole, gozan da lectura dun conto.

Unha actividade moi gratificante para todos e todas.

Martina. Petan á porta

 

"Rosalía sempre viva"

 O día 22 de marzo celebrouse en Outeiro de Rei (Lugo), o concurso de recitado poético "Rosalía sempre viva", organizado pola casa museo de Manuel María e destinado ao alumnado non universitario sobre poemas de Manuel María e Rosalía de Castro. 

Para este concurso foron 3 alumnos en representación do noso colexio:

Catalina Meijueiro, Lara Filgueira e Marcos Méndez de 4º de primaria. Aquí temos as súas actuacións, un gran traballo feito por cada un deles.

Periódico Gafitas

 PERIÓDICO GAFITAS

Ultimamente temos publicacións clandestinas no Feliciano Barrera…

Un xornal circula polo colexio sen control algún do profesorado…

E non nos pode facer máis ilusión!!!

Catalina e Giulia, de 4º de primaria, redactan, editan, maquetan e distribúen o seu propio xornal temático: o Periódico Gafitas. O tema, claro e contundente: NON Á CONTAMINACIÓN.

Como nos gusta que os nenos e nenas teñan iniciativas e que atopen no colexio tempos e espazos para levalas a cabo. Bo traballo, rapazas!!!

 

Candela. Petan á porta

 

Os Leolectores de 4º remataron a lectura de "O neno de lume"

En cuarto leron o libro "O neno de lume" e remataron cun traballo sobre a vida da súa autora Ledicia Costas e sobre diferentes elementos gramaticais traballados durante o trimestre: clases de determinantes: artigos determinados e indeterminados, posesivos, demostrativose tamén pronomes e verbos. Os cativos e cativas traballaron na procura de todos eles entre as páxinas deste apaixonante libro. Como sempre nenos e nenas, un excelente traballo.

 Aproveitando que estamos lendo o libro "No corazón do bosque" de Agustín Fernández Paz, no clube de lectura Leóns Lectores de 3º de primaria, decidimos sair a buscar follas diferentes do bosque do no redor para clasificar segundo o seu borde e a súa forma. Quedáronnos uns herbarios completísimos.

Exposición de Castelao no Ceip Feliciano Barrera

 En 2025 celébrase o 75º aniversario da morte de Daniel Alfonso Rodríguez Castelao, unha das persoas máis influentes da Galicia Contemporánea.

Grazas a esta exposición facilitada polo concello de Ponteareas, os nenos e nenas do cole poideron achegarse á figura de Castelao e gozar coas súas caricaturas e frases máis recoñecidas. Así, os nenos e nenas coñeceron a unha figura polifacética que foi caricaturista, debuxante, ilustrador, columnista, escritor, pintor, e político. 

Castelao defendeu sempre a necesidade de construir unha arte e unha cultura propia en Galicia e foi e segue sendo unha das figuras máis destacadas do galeguismo.

Club de lectura "Lendo a todas horas" de 5º de primaria

 Despois da lectura do libro titulado "Matilda" de Roald Dahl, os nenos e nenas de quinto de primaria fixeron unhas marionetas moi sostibles con material de reciclado. 

Semana da poesía no Ceip Feliciano Barrera

 Este ano, para conmemorar o día da poesía que tanto gusta no cole, celebramos un recital de poesía coa participación de Infantil, 1º, 2º e 3º de primaria. Durante as horas de lectura de toda a semana puidemos gozar de moitos de preciosos poemas.

Diego. Petan á porta

 

LEO - LAB

Leo - Lab é o nome dunha das modalidades dos Proxectos Innova - Lab, que buscan a mellora dos centros escolares mediante a implementación de proxectos de innovación educativa.

Leo - Lab, concretamente, está enfocado ao centro educativo como promotor da comprensión lectora da comunidade escolar.

O noso proxecto desenvolve, fundamentalmente, tres medidas:

- Obradoiros de prevención de dificultades da comprensión lectora para infantil e 1º e 2º de primaria.

- Obradoiros de alfabetizacións múltiples e vida diaria, para 3º, 4º, 5º e 6º de educación primaria.

- Avaliación obxectiva do nivel de comprensión lectora antes e despois da posta en práctica dos obradoiros en 3º, 4º, 5º e 6º de primaria. 

Na imaxe podedes ver un exemplo de unha das actividades realizadas en 4º de primaria. 

 

DEPORTE ESCOLAR: BÁDMINTON

 

O venres pasado os nenos e nenas de 5º e 6º de primaria compartiron co alumnado do CEIP Antonio Blanco, de Covelo, un marabilloso día de deporte e convivencia.

A xornada desenvolveuse no Pabillón Álvaro Pino e foi organizada polo Club Bádminton Ponteareas. Os nenos e nenas aprenderon os fundamentos técnicos e tácticos do deporte, así como o seu regulamento básico. 

Os alumnos e alumnas mellor clasificad@s participarán no Campionato Zonal de Bádminton, que se celebrará o próximo 5 de abril.

Como sempre nestas xornadas, o comportamento do alumnado foi impecable. Nunca nos cansaremos de felicital@s por iso!!!

Por último, queremos agradecer a Víctor Lemos, adestrador do club, a súa cálida acollida e felicitalo pola exemplar organización das xornadas.

Vémonos en abril!

MÁIS FAMILIAS NA ESCOLA: MARTIÑO

 

A semana pasada estiveron cos nenos e nenas de infantil a nai e o pai de Martiño.

Contáronnos un conto, guiaron unha actividade plástica e contestaron a todas as preguntas que lles quixeron facer (asegúrovos que nunca son poucas). O tema, simple e apaixoante ao mesmo tempo: mans e pés. 

Como sempre que se pasan polo colexio, un éxito absoluto!

Moitas grazas a Cristal e a Pedro por celebrar o aniversario de Martiño connosco. O voso tempo é o mellor agasallo!!!

A ZERO!

 

Luns e mércores a cero no Feliciano Barrera!

Os nenos e nenas de 1º, 2º, 3º e 4º de primaria gozaron esta semana dos obradoiros do Proxecto Ponte a Zero, Programa de Educación, Formación e Divulgación Ambiental sobre a Redución e Xestión dos Residuos da Provincia de Pontevedra.

Mediante dinámicas e xogos os nenos e nenas descobren a importancia de separar correctamente o lixo, de reciclar e reutilizar obxectos, do aproveitamento de materiais... e de todas aquelas pequenas / grandes accións cotiás que melloran a saúde do noso sufrido planeta.

Bo traballo!

MÚSICA É VIDA

 

Porque a música é vida e porque a vida é música!

Que fermoso traballo que fixeron os nenos e nenas de primeiro de primaria!

Resulta que as claves, as notas, as brancas, as negras, as corcheas... non son soamente para escoitar ou ver. Pódense coser, dobrar, ordenar e, se me apuras, creo que mesmo pódeselle pasar o ferro!

En fin, a actividade non é fácil de describir. Convídovos a que vexades o vídeo!

XEOMETRÍA ACTIVA

En 4º de primaria seguen traballando con dimensións e espazos. Despois de deixarnos abraiados e abraiadas cos seus planos dunha vivenda ideal deron o salto ás tres dimensións.

Comezan asentando ben as bases (nunca mellor dito) para construír os seus propios corpos xeométricos. Conos, pirámides, cubos, prismas…

Non sabemos agora mesmo como continuarán o traballo, pero encantaranos contárvolo!

Ainoha. Petan á porta

 

A NOSA COMPAÑÍA!

Xa comezamos a traballar por profesións, cada profesión xa ten un pouco de traballo feito.

Os nosos interpretes son: -Diego, Ainoha, Candela, Gala e Cecilia. Están creando os seus propios guións,  son moi divertidos!!!

Os nosos músicos son: - Unai, Martina e Neyzan. Están facendo as cancións dos nosos intérpretes. Que pegadizas son!!!

Da escenografía encárganse: - Leire e Xoel. Están creando a nosa imaxe e o noso decorado. Son moi creativos!!!

Da rexiduría ocupámonos: - María e Laura. Estamos coordinando os grupos. que ben o están facendo!!!

Club de lectura de 5º de Primaria "Lendo a todas horas"

 Os nenos e nenas de 5º de primaria, despois de ler o libro "El principito" representaron a súa visión deste libro nunha preciosa maqueta.

Os Leóns Lectores de 3º de primaria

 Despois de ler o libro "Mi nombre es Skywalker" de Agustín Fernández Paz, os nenos e nenas de 3º mediante o club de lectura traballaron a descrición dos personaxes principais do libro.  Comenzaron coa técnica "Dez veces dúas", nomeando cualidades dos personaxes e completando coas que nos coincidían cos seus compañeiros. Remataron a tarefa completando a portada do libro cos debuxos dos personaxes que desapareceran.

Agora xa están preparando a seguinte lectura!