VISITA A DIVERSA

 

Onte o alumnado de educación infantil e primeiro e segundo de primaria visitou "Diversa": Mostra Internacional de Ilustración Contemporánea. Foi no Teatro Afundación, en Vigo.
Resultou unha experiencia moi completa. No obradoiro STEAM e de sostibilidade "Universo Diverso" os nenos e as nenas crearon a súas propias criaturas fantásticas e secáronas cun simpático sistema de ventiladores que tiñan que montar e conectar.
A visita á exposición foi preciosa. Entre outras, recibimos tres chaves fundamentais na vida: a da natureza, a da imaxinación e a da diversidade. É posible que algún futuro ilustrador ou ilustradora atopase inspiración este día.
Por último, lembrade que estivemos en Vigo polo Nadal. É posible que non vísemos os doce millóns de leds, pero podo asegurarvos que vimos uns cuantos miles.
Por sorte, a choiva respectou o noso paseo pola rúa do Príncipe e a Porta do Sol e puidemos percibir con toda claridade que se achega o Nadal!!!

NOVEMBRO: MES DA TRISTEZA

 Xa queda atrás o mes de NOVEMBRO dedicado á emoción da TRISTEZA. 

As obras de arte propostas desde a biblioteca foron o vello guitarrista cego e O asceta de Picasso, A habitación en Arlés de Van Gogh e a escultura de Les Voyageurs de Bruno Catalano.

O alumnado elaborou y diferentes traballos de expresión escrita, imaxinación, observación e creatividade. Así de bonito quedou o panel colaborativo do mes de novembro. 

Comenzamos decembro e con el a ALEGRÍA!

VOLVE A CASA POLO NADAL

 

Chegou decembro e, con el, o Elfo de Guláns.

Todo o mundo sabe o moito que queremos ao noso elfo. Vén cada Nadal para enchernos de alegría, para traer agasallos, para facernos rir cos seus bailes...

Pero como nada nesta vida é de balde, tamén vén cada ano para coarse pola noite no colexio e facer todo tipo de trasnadas.

En educación infantil esperan cada día de decembro con estusiasmo e curiosidade. Onte mesmo montaron á arbore para que o elfo estea como na súa casa.

De momento temos unha carta súa. Seguiremos informando!!!

SEGREDOS

 

Que estarán argallando en educación infantil? Preguntei, pero o único que me quixeron dicir é que "é algo para o medo"...

Observando con atención, cheguei a tres conclusións: Están a traballar a motricidade fina; están a traballar a concentración e están a traballar as emocións.

Se alguén ten unha idea, por favor que a comparta!

Seguirei investigando!

TertArte decembro

 

Aquí vai a pregunta para este mes.

Xa sabedes a resposta? Pois deixádea na caixa de correo de Leo León.

 

Actividade do 25N na biblioteca escolar: flores que alzan a voz, A FLOR DO BO TRATO.

Este 25 de novembro, día internacional da eliminación da violencia contra a Muller, a nosa biblioteca convertiuse nun espazo de reflexión, lectura e creación para todo alumnado do Centro a través dos libros, das palabras e o traballo cooperativo.

Propuxemos as seguintes lecturas por ciclos sobre a igualdade e convivencia: Nos tratamos bien de Lucía Serrano, Rosa Caramelo e Artur e Clementina de Adela Turín, Hai algo máis aburrido que ser unha princesa Rosa? De Raquel Díaz e O libro dos porcos de Anthony Browne.

Despois da lectura abriuse o diálogo sobre o significado de respeto, a igualdade ou os coidados. De seguido, cada grupo decidiu cinco frases sobre o traballado e escribíronse nunha man. Non era unha man calquera, senón  que esas mans convertiríanse en pétalos para formar a nosa flor do bo trato.

Con esta actividade buscamos fomentar valores de respeto, igualdade e exemplos de bo trato desde as idades máis temperás.

Expositor na biblioteca sobre o 25 N

Como é habitual todos os anos, na biblioteca de Leo León fixemos unha selección dos contos que mellor tratan este tema.

OUTONO EN FAMILIA

 

O calendario di que quedan aínda 24 días para que comece o inverno, pero o noso nariz xeado e o bafo que exhalamos polas mañás so respirar din outra cousa.

En educación infantil sempre esperan con ilusión o inverno porque, nada máis empezar, tráenos o Nadal. Pechan o outono, iso si, cunha preciosa exposición na que toda a nosa familia educativa achegou o seu gran de area.

Moitas grazas a todos e a todas por participar e por acompañar, unha vez máis, aos máis pequenos e pequenas do colexio nas súas aventuras!

25N: QUE PRECISAS PARA VOAR?

 

E ti? Que precisas para voar e ser libre?

Este 25N un mesmo lema une a todo o alumnado do centro. Simple e á vez complexo; pero, sen dúbida, directo ao corazón.

Todas as persoas necesitamos o mesmo: diálogo, comprensión, liberdade para tomar decisións propias...

As nosas bolboretas saen dos tarros portando as palabras de paz e amor que as nenas e os nenos escribiron, por se acaso, en varios idiomas. Para que se entendan mellor!

Un ano maís o CEIP Plurilingüe Feliciano Barrera posiciónase, claramente e sen excepción, en contra de calquera tipo de violencia. 

UN DORMITORIO EN ARLÉS

 

Vincent van Gogh pintou tres versións do seu famoso cadro. Pintounas de diferentes cores, de diferentes tamaños... Aos nenos e ás nenas de educación infantil inspiroulles diferentes emocións tamén, pero unha predominou sobre as demais: a tristura. A nosa emoción do mes de novembro!

O proxecto "Emocións nas Artes" continúa avanzando no Feliciano Barrera. 

Despedimos novembro, despedimos a tristura.

Demos a benvida a decembro e, con el, á alegría!

PLENO DA INFANCIA E DA ADOLESCENCIA

 

Onte celebrouse unha importante cita anual para nós: o Pleno da Infancia e da Adolescencia do Concello de Ponteareas.

Despois dun gran traballo de reflexión e de redacción chegou o momento da exposición. Anxo e Xoel, de 5º e 6º de primaria respectivamente, representaron ao centro explicando as propostas e ideas recollidas respecto a Dereitos Dixitais e outras cuestións que preocupan ao noso alumnado. Fixeron unha exposición realmente estupenda!

Eles tomáronse moi en serio a súa responsabilidade como representantes electos do Feliciano Barrera, agora tócanos aos adultos tomarnos en serio as súas opinións, propostas e reflexións.

Grazas ao Concello de Ponteareas por organizar esta actividade e por convidarnos un ano máis. Dar voz aos nenos e nenas é imprescindible para mellorar e seguir avanzando como comunidade. 

ESTRATEXIAS DE APRENDIZAXE. FORMACIÓN PARA FAMILIAS. ENAPAS.

Queres acompañar á túa filla ou ao teu fillo nos seus estudos de forma eficaz? Necesitas un pouco de axuda para facelo?

O martes 18 de novembro ás 16:30h tes unha cita no Feliciano Barrera!

A ANPA San Xulián, coa colaboración do CFR de Vigo, organizou unha charla para explicar dististas estratexias de aprendizaxe e como se poden aplicar no fogar. 

Anímadevos a vir!!!

 

FAMILIAS NA ESCOLA: LÍAN

 

Nesta ocasión o programa "Familias na Escola" sufriu unha pequena variación e converteuse en "Escolas na Familia". Explícovos:

O martes pasado todos os nenos e nenas de educación infantil foron de visita a casa de Lían. A súa nai tíñalles preparada unha marabillosa acollida.

Explicoulles como se preparan os altares de mortos tradicionais en México. Aquí pode parecer un tema difícil para estas idades, pero para nada, saíron encantados e encantadas! Viron as fotografías dos seres queridos e das súas mascotas, obxectos que os representaban, candeas e outras ofrendas.

Aínda por riba, tamén puideron degustar dous doces mexicanos típicos desta época do ano. 

Unha experiencia estupenda!

Moitas grazas á familia de Lían por organizala!!!

MARTES DE MUSEO

 

Como xa sabedes, o noso proxecto anual de centro ten que ver moito coas artes este curso. Tan pronto xorde a oportunidade, imos directos e directas ao museo!

O alumnado de 3º, 4º, 5º e 6º de primaria visitou o martes o Museo Provincial de Pontevedra. 

Os nenos e nenas do terceiro ciclo participaron na actividade "Museando. Descubrir a arte a través do xogo", unha variante do Quen é quen? na cal, no canto de adiviñar se falaban de Luis ou de Mercedes, tiñan que atopar respostas sobre pintura, escultura, relevo...

Pola súa banda, os nenos e nenas de segundo ciclo participaron en "Detectives da Arte", xogo no que a través de distintas pistas ao longo das salas do museo, entre todos e todas descobren a identidade do ladrón. 

Despois da visita, xa xuntos os catro cursos, pasáronse a ver a Praza de Abastos de Pontevedra.

Unha mañá moi ben aproveitada!!!

PLENO INFANTIL NO CONCELLO DE PONTEAREAS

 

Nova sesión preparatoria para o Pleno Infantil no Concello de Ponteareas.

A temática, sen dúbida, xera debate; pero resulta fundamental a día de hoxe: Os nosos dereitos dixitais.

Alumnos e alumnas propuxeron distintas medidas como, por exemplo, a construción dun cíber como espazo seguro de dixitalización ou a creación, por parte do Concello, de aplicacións educativas que non supoñan riscos para os cidadáns e cidadás.

O alumnado de 5º e 6º de primaria segue avanzando na reflexión e na capacidade de poñer palabras ás súas ideas e necesidades.

Parabéns!