FESTIVAL DE CANS 2024

 

Un ano máis que paseamos os pezuños polo Cans Voulevar!

Esta vez, o alumnado de 1º, 2º, 3º e 4º de primaria tivo a oportunidade de presentar unha das nosas curtametraxes: "O Cascabel da Gata".

Ademais, os nenos e nenas de segundo subiron ao "escenario" do jalpón para explicar as reviravoltas de produción da gata Benita.

Toda una experiencia!

Visionado de curtametraxes; charla acerca das profesións que se desenvolven ao redor do cine; photocall (photochimpín, mellor dito); percorrido pola aldea...

Agroglamour levamos e agroglamour deixamos!!!

Tedes ata o sábado 25 de maio para visitar o Festival de Cans!

LETRAS GALEGAS 2024

Hoxe o tempo permitiunos ao fin celebrar o Día das Letras Galegas como se merece.

Ademais das actividades realizadas a semana pasada, como o Pasapalabra de Luisa Villalta ou o deseño e elaboración de chapas conmemorativas en Polos Creativos; hoxe engadimos unha Gran Xincana das Letras.

Dez equipos de alumnado mesturado de todas as aulas, liderados por un neno ou nena de 6º de primaria, enfrontáronse a 10 probas relacionadas coa escritora homenaxeada este ano.

Supoño que non fai falta aclarar que todos e todas superaron o reto marabillosamente. É o bo de traballar en equipo!

Ao final, un pequeno premio tradicional: unha buxaina para os nenos e nenas de primaria e ras saltarinas para infantil.

Aínda sabedes facer bailar unha buxaina? Convidámosvos a probar cos vosos nenos e nenas!

 

PROXECTO RECICLAXE

 

En primeiro e segundo de primaria remataron un proxecto moi ambicioso. Propuxéronse poñer en marcha as tres RRR no Feliciano Barrera: Reducir, Reutilizar e Reciclar gran parte dos residuos.

Comezaron investigando nos libros da Maleta Ponte Zero. Préstamo do CEIDA (Centro de Documentación Ambiental Domingo Quiroga) Moitas grazas, por certo!!!

Continuaron etiquetando e fabricando os seus propios contedores para levar despois o lixo aos de fóra. Non importa que chova!

Finalmente, compartiron os seus coñecementos coas demais aulas do colexio concedéndolles a súa insignia de clase ecolóxica. 

Tamén afondaron nalgunhas cuestións grazas á charla de SOGAMA deste luns. Que interesante!

Un gran traballo!!!

CORPUS ADIANTADO

 

Cheiraba a Corpus hoxe no Feliciano Barrera.

Flores, fentos, landras e demais materiais típicos das alfombras florais adornaban o noso patio.

Comezou o alumnado de 4º, 5º e 6º de primaria; que era para o que, nun principio, estaba destinada a actividade. Logo chegou o recreo e o resto de nenos e nenas quixeron achegar o seu gran (nunca mellor dito) a unha das dúas alfombras.

Moitas grazas ao Concello de Ponteareas por organizar a actividade e permitir participar a todo o alumnado, aínda que non entrase na programación. Agradecemos moito a flexibilidade!!!

Por certo, quedou clarísimo que en Guláns hai canteira alfombrista!

MODELO DE ESCOLA RURAL

O venres pasado participamos no II Congreso Nacional da Escola Rural, que este ano celebrouse en Ribadavia.

Convidáronnos para presentar o Proxecto de centro do ano pasado, "Festival de Cine de Guláns", e contar as actividades que estamos a levar a cabo este ano ao redor de "Radio Guláns", proxecto que, este curso, aglutina múltiples e variados podcast e vídeo podcast.

María e Martina, de 5º; Izan, Yaiza e Breixo, de 6º de primaria, foron seleccionados polo alumnado das súas clases para representar ao centro.

Explicaron marabillosamente ben o proxecto a todas as persoas que por alí pasaron, incluído Román Rodríguez, conselleiro de Educación, Ciencia, Universidades e FP. 

Só 15 centros de Galicia tiveron a oportunidade de reivindicar a escola rural como modelo educativo de vangarda e un deles foi o noso. Todo un orgullo para a comunidade educativa do Feliciano Barrera!

Club de lectura 4º - A viaxe do vikingo soñador - Ana Merino.

 O Club de lectura de 4º de Primaria traballaron o conto "A viaxe do vikingo soñador" de Ana Merino, Descubriron unha sorprendente viaxe cara o lugar onde habitan as respostas e onde se esconde o verdadeiro amor. Unha delicia de poema épico que é como unha historia, en verso, cheo de aventuras e personaxes. Pareceulles precioso e quixeron facer unha banda deseñada, en galego, do conto.

Biblioteca creativa - Antifaces, circuíto téxtil

 Dende Biblioteca creativa, o alumnado de 6º, realizaron os antifaces coa técnica do circuíto eléctrico téxtil, usando fío condutor, pilas e Leds, para integrar a tecnoloxía, coa técnica tradicional, en tecidos. Un xeito divertido de entender a electricidade.

BIBLIOTECA CREATIVA - LETTERING NA ESCOLA.

 Dentro do programa Biblioteca Creativa; o alumnado de 3º, 4º, 5º e 6º de Primaria gozou dunha actividade moi especial: un obradoiro de lettering.

O lettering é algo máis que caligrafía, é unha disciplina artística máis próxima ao debuxo que á escritura.

Os seus beneficios para nenos e nenas son múltiples: fomenta a creatividade e concentración; reduce o estrés; mellora a escritura e ofrece un espazo para a expresión de emocións e sentimentos.

Da man de Gabi (@gabi.pastoriza) e Ana, de Studio 57 (@studio57escueladebaile), a experiencia non puido ser mellor. Moitísimas grazas por ofrecernos unha mañá tan artística e divertida!

Libros ao patio

 Hoxe fixemos a nosa xa clásica actividade :"libros ao patio" para seguir celebrando a semana do libro.

Todo o alumnado participou nela e gozaron lendo,  no patio na hora de lectura, sós  ou en compañía. 

Día do libro: apadriñamento

 Hoxe era un día moi especial: O día do libro. Desde a blbioteca celebrámolo cunha actividade moi bonita na que participaron todos os alumnos e alumnas do cole: Os apadriñamentos.

Os alumnos e alumnas de 6º, 5º, 4º e 3º foron nomeados padriños e madriñas dun neno ou nena de 2ºe  1ºde primaria e 4º, 5º e 6º de infantil que a súa vez serían os seus afillados e afilladas. 

Madriñas e padriños acudiron á cita cun pequeno agasallo para os seus afillados e buscaron entre as 3 caixas  preparadas polos axudantes de bilbioteca, un conto para ler durante a hora de lectura. 

A actividade foi entrañable.

A HORA DO CÓDIGO

 

A "Hora do Código" é unha iniciativa internacional que pretende introducir a persoas de todas as idades no desenvolvemento do pensamento computacional.

É un evento organizado por Code.org, unha organización sen ánimo de lucro dedicada a expandir as ciencias da computación na educación.

En sexto de primaria participaron nun dos eventos, aprendendo unha chea de conceptos de programación.

Recibiron un diploma acreditando os coñecementos adquiridos e, o máis importante, gozaron moito da experiencia. 

Novidades do mes de abril, na semana do libro

 Estas son as últimas novidades deste curso. Pasade pola biblioteca para botarlles unha ollada

PROXECTO AVES EN 6º DE EDUCACIÓN INFANTIL

 

Xa sabemos o moito que, en xeral, gustan aos nenos e nenas os animais. Se falamos de educación infantil, podemos dicir que é adoración o que senten por eles. 

Nesta ocasión 6º de educación infantil concentra os seus esforzos nas aves e faino a través de realidade aumentada, tecnoloxía que combina o mundo real con elementos virtuais.

Como alucinaron cando viron ás súas aves saír do papel no que as debuxaron para converterse en figuras tridimensionais, medrar e incluso marchar de paseo.

Unha gran experiencia!

ATLETISMO EN 4º E 5º DE PRIMARIA

 

Nova xornada de deporte escolar!

Nesta ocasión foi o alumnado de 4º e 5º de primaria o que se achegou ao IFEVI de Vigo para practicar diferentes modalidades de atletismo: salto de lonxitude, lanzamento de peso e vortex, carreiras de diversas distancias individuais e por equipos...

Unha experiencia, como sempre, moi completa e divertida que tivemos a oportunidade de compartir con outros colexios do Condado e Paradanta. 

LUZ Y SOMBRA

"Luz y sombra"é o título do poema de Tere Acosta que recita para nós o alumnado de 4º de primaria.

E un texto moi fermoso que fala das dificultades para comunicarse e relacionarse que atopan, nos casos máis severos, algunhas persoas con autismo. Pero non só fala de dificultades; tamén fala de pontes, de tradutores, de mapas para entendernos... En fin, unha beleza de traballo!

Animámosvos a escoitalo.