25 N. Día Internacional da Eliminación da Violencia contra a Muller

 Desde a  biblioteca de Leo León  recomendamos aos nosos lectores/as estes contos relacionados coa conmemoración do 25 N.

Discamino de Santiago

Onte 5º e 6º de Primaria asistiron a unha charla moi especial e emocionante na Avisoureira. Os relatores eran persoas con diversidade funcional que fixeron o camiño de Santiago grazas a DisCamino de Santiago, un proxecto que nace en 2009 co principal obxectivo de facer o camiño de Santiago accesible para todas as persoas, incluídas, por suposto, aquelas que presentan algunha discapacidade. Convidámosvos a visitar a súa web, discamino.org , e emocionarvos coas experiencias de superación e de inclusión que alí se contan. Grazas ás persoas que onte, coas súas palabras, fixeron que o noso alumnado reflexionase sobre a enorme cantidade de cousas que poden facer e que fan as persoas con discapacidade no seu día a día. Foron un gran exemplo para todas as nenas e todos os nenos.

Esta actividade, organizada polo departamento de orientación do centro, é a primeira dunha serie que comeza a semana que vén en conmemoración do 3 de decembro, Día Internacional das Persoas con Discapacidade. Seguirémosvos contando!

Pleno Infantil

 Hoxe o colexio participou, como cada ano, no Pleno Infantil do Concellode Ponteareas, presidido pola nosa alcaldesa.

Lucía e Amélia, de 5º e 6º foron as encargadas de representarnos e fixérono realmente ben.

O tema tratado este ano non podería ser máis adecuado. Os nenos e as nenas necesitan que se fale da súa saúde mental e que se dea resposta rápida e eficaz ás súas inquietudes. 

Gracias ao Concello pola invitación. 

Día da infancia

 O alumnado de 3º fixo este vídeo para conmemorar o día da infancia:

Escola de MAXIA

Se sodes un dos millóns de seguidores ou seguidoras da saga Harry Potter estades de sorte. En sexto de primaria adoptaron o método Hogwarts e agora somos unha escola de maxia. Os nosos alumnos e alumnas recibiron a súa carta de admisión e atravesaron a plataforma 9 3/4 para formar parte dun proxecto máxico. Celebrada a cerimonia do Chapeu Seleccionador, xa todos e todas saben a que casa pertencen e cales son as súas principais características. Ao longo do curso veremos brillar a valentía dos Gryffindor, a intelixencia dos Ravenclaw, a tenacidade dos Huffelpuff e, por que non, tamén a ambición dos Slytherin. A un capítulo por semana, os nosos xoves meigos e meigas, irán superando retos e probas que relacionarán os contidos das materias con outras actividades máis lúdicas. Informaremos puntualmente dos seus avances nisto da maxia e, se vedes nenos e nenas polo ceo voando nas súas vasoiras, non vos preocupedes, non estades alucinando, seguramente sexa un partido de Quidditch!

Ciberseguridade na escola

 As nenas e nenos de quinto de primaria levan semanas preparando a súa participación na segunda edición do concurso Ciberseguridade no Cole. Viron vídeos, reflexionaron, comentaron as súas ideas… Esta semana puideron ao fin poñer en práctica os coñecementos adquiridos e fixérono realmente ben. O máis importante é que son un pouco máis conscientes dos riscos que entraña o uso de medios dixitais e dispoñen de máis ferramentas para afrontalos. Parabéns!!!

O mundo dos cogomelos

A maioría de vós xa sabedes que, este venres, Anxo deu no colexio unha charla sobre micoloxía. Como moi ben explicounos Petra, a súa filla, o seu papá ía explicar as normas dos cogomelos: que non debemos pisalos, que non debemos collelos todos… Imposible resumir nun post todo o que nos explicou Anxo no tempo que pasou connosco. Só dicirlle que a todos e todas nos encantou a súa presentación e que estamos profundamente agradecid@s pola súa visita. Volve cando queiras!

Novembro, Mes da Ciencia en Galego nas Bibliotecas - 2022

 As nenas e nenos de 6º, realizaron un magnífico traballo sobre os diferentes tipos de células e as súas partes na materia de Ciencias Naturais. O traballo está exposto na biblioteca e os alumnos de sexto que ademais son os axudantes da biblioteca están dispostos sempre a dar unha pequena explicación sobre as células a quen o precise.

Festa de outono

 Aquí vai o vídeo coas cabazas, contos, maquillaxes, castañas e xogos da nosa festa de outono!

Novidades de novembro.

Novembro chega cheo de novidades, na que non poden faltar as historias emotivas de amor (Filla), de dor (Zimbo) de aceptación (Nariz de Ouro) e poesía (Canta miña rula, canta). Tampouco esquecernos dos contos clásicos (Os sete cabritos, A princesa do Caurel), fantásticos (Sopa de rato), de estereotipos (Non todas as nenas lles gusta o rosa), nin os de misterio (Amanda Black).

Pero este mes queremos centrarnos nas novidades científicas para contribuír ao mes da ciencia en galego nas bibliotecas escolares: Así poderedes coñecer máis sobre o cambio climático, as estrelas, a toupiciencia e os experimentos científicos, que nos promoven a curiosidade e amosan o importante que é facérmonos preguntas para aprender e avanzar.